Manyuluh ikan

97-MANYULUH.

    Satu lagik cara mandapati ikan ialah manyuluh. Manyuluh tantunya waktu malam. Wayah tu pulang banyu bandang tangah di naikkakan. Bandang balum di tajak atau balum di bajak awan kubuta, jadi tagah pang lagi awan jarami awan rumput2nyak. Bila banyu bandang mula naik, ikan2 gin mayau pang ka marata bandang. Waktu tu lah nang ramik manyuluh ikan nik. Sabujurnya manyuluh nik hagan maitihi ikan nyak di mana bapatak atau baranai. Marayau pang di bandang, di anak anak parit mnyuluhi ikan awan suwar. Amun dah kalihatan bersiap pang. Parkakas nang di gunakan parang panjang, bukan hingkat di tangkap kaitu hajak. Mun dah kalihatan kalibat ikan, di libas atas di tatak pang di lakasi, amun kanak manimpas, kalihatan nai habang banyunya awan darah ikan. Hahari hak lagik, musti ada ikan nang sudah panggal di situ. Salalunya nang nyaman di ulihi manyuluh nik ikan haruan atau ikan kali juaam. Ikan tu ganal ya am, nyaman manimpas. Bah amun rajin bahayau manyuluh satumat jua am banyak pang baulihi. Taga tu pang ikannya panggal2 hudah kana timpas, mun bawa bulik kana lakas pang manyiyangi.

Bagagau

96-BAGAGAU.

     Amun sudah kadida paralatan manangkap ikan maka bagagau pang caranyak. Bagagau nik sabujurnya ramik. Amun bakawanan balawanan pang siapak nang cakap, nang handal, nang pambisaan baulihi manangkap ikan. Batajun hajak ka kolam atau ka parit nang ada padang tagah. Di hahari pang di bawah rumput rumput tuh. Selalunya bagagau wayah banyu surut, wayah banyu bandang hudah di buang, ikan bakumpulan pang di dalam kolam. Bagagau nik mau bisak awan cakap. Amun tarasa ada ikan tahahar, lakasi pang di kacak, jangan bagi lapas lagik. Taga tu pang bagagau ni, silap silap takacak ular guni atau ular tanah nang bagana di banyu. Amun kada pawanian jangan lah handak bagagau, aur takuciak takuciak banarai kainak.

Mamasang halat bubu.

95-MAMASANG HALAT BUBU.

   Satu lagi alat mamarangkap ikan ialah bubu. Bubu lagi ganal pada lukah, bantuknya tinggi. Bubu di pasang di parit ganal. Mamasang bubu parlu ada halatnya. Halatnyak jua di ulah dari buluh. Di rantang saganal parit. Di pinggir halat hanyar di andaki bubu. Halat bubu batujuan mahalang parjalanan ikan. Satiap ikan nang handak malintas dari kiwak ka kanan atau dari kanan ka kiwak akan manyusup di higa halat hampai tabuat ka muntung bubu. Muntung bubu ni biasanya 2 balah. Dari mana hajak ikan bakunyung, bulih tabuat pang ka dalamnya. Nasib2 pang jua, amun banyak rezeki, banyak pang baulihi. Taga bahari saja banyak ikan, musti ada hajak baulihi. Takadang nasib baik hundang galah gin banyak baulihi mamasang bubu nik. Saja ramik bahari. Kada suah taputus bakalan ikan bagana di bandang.

Mamasang lukah

94-MAMASANG LUKAH.

     Lukah ni salah satu alat mamarangkap ikan. Lukah bahari di ulah dari buluh. Arwah ayah ku mimang bisa maulah lukah. Saja harat ulahan nyak. Lukah biasanya di pasang di parit haloi paranggan bandang. Waktu banyu bandang handak di buang. Amun patang nik mamasang, esok pagi pang hanyar maitihi. Mamasang gin handak bisak, andak bujur bujur munak hinjapnya ke dalam banyu, di higanya sumbati awan rumput rumput supaya ikan jangan talapas di kalaluannyak. Sabalah hujung lukah musti timbulkan saikit, jangan samuwaan tanggalam. Amun samuwaan tanggalam, amun ada ikannya nya apa matik kainak kada hingkat bahinak. Amun nasib baik apa banyak pang ikan babuatan ka dalam lukah. Amun nasib kada baik apa di buati ular gunik. Ular gunik mimang sukak mamakan ikan nang sudah taparangkap di dalam lukah. Lagi satu amun arik hujan labat, lakas lakas pang di itihi, kaluku lukah hanyut atau tanggalam. Amun hanyut kaluku hilang atau rusak. Amun tanggalam kaluku habis matian ikannyak. Tu pang lukah nik, bagantung pada nasib hajak pang.

Manuba

93-MANUBA.

      Manuba ni satu parbuatan nang paling di sariki urang. Mapa kada sarik, amun habis ikan saparitan matian. Dari nang palacingan hampai ka nang ganalan, samuwaan matik. Nang sayangnya amun kada kasawatan maipiei. Mamutih pang timbulan udah jadi bangkai, babau harok. Manuba ni gawian urang kulir awan bungul nyak. Biasanya nang manuba nik kada bapadah, bararanai hajak saurangan, tu nang ngalih mangatahui, siapak nang manubak. Takoni hak sapa sapa, mimang kadida nang mangakuk nyak.

   Ikan nang hanyar di tuba salalunya mabuk, kada hiran di urang. Nyaman banar manangkapnyak. Amun ada kalihatan, sauk hajak pang, ikan tu kada bukah. Di tangkap kaitu hajak gin mau hajak. Udah nak mati ya am. Kada badaya lagik. Amun kita kada maambil, ikan tu matik hajak pang, esok jadi bangkai babau harok. Sayang..... amun ada kasawatan di ipiei hajak. Hingkat hajak di ulah ikan karing. Amun di masak di makan kaitu hajak kada tapi nyaman lagi.

Mamukat

92-MAMUKAT.

    Bahari bagana di bandang kada kakurangan ikan. Macam2 carak manangkap ikan. Ikan dari nang haloi sampai ka nang ganal samuwaan di sapuk. Manjala, mahancau, maunjun, mangalau, manajur, manangguk, nintu biasa hajak. Taga ada sakumpulan manusia nang tagak rakus manurun nakan pukat. Mamukat ni biasanya depak di parit ganal. Paling kurang 4 urang. 2 manarik di sabalah pangkal di kiwak awan kanan parit. 2 lagi di sabalah hujung di kiwak awan kanan jua. Jaraknya labih kurang ½ batu. Bila dah sama sama manarik, ahirnya kainak batamuan di tangah, maka kada hingkat kamanaan lagi pang ikan bukahan. Bilang samuwaan pang ikan taparangkap di dalam pukat. Malainkan ikan nang bapatak di higa di padang tagah nang kada tabuat. Amun ikannyak banyak mau hajak sapikul sakali angkat. Urang mamukat ni biasanya hagan bajualan. Mun mamakan surang kada kahabisan.

     Tu pang urang mamukat nik di sariki urang lain. Mahabisakan ikan ujarnyak. Mapa lagi handak baulihi ikan bagi urang nang  manjala atau mahancau. Mapa ngituai, handak d sariki asa kada purun, kaluku jadi bakalahian pulang kainak. Basarah hajaklah pada ALLAH, razaki Allah tu kada kurang kadaam.

Manangguk anakan

91-MANANGGUK.

     Manangguk ni manangkapi anak anak ikan. Musimnya di bandang wayah banyu bandang tangah di isi’ee. Masa tu lah ikan ikan bahintaluan awan baranakan. Nang ramik manangguki anakan haruan. Anakan haruan hidup bakumpulan. Bila dah tajumpa hajak kumpulan anakan haruan, basadia pang lagi, di kapungi, di kalilingi awan tangguk. Imbah tu di ceduk kaut tai lagi. Nah hikaman.... amun bisa manangguk saja banyak pang nang tabuat, beribu ikung anakan haruan habang habang lagik. Sudah di tangguk, buat ka dalam bakul nang di ikat di pinggang. Bahayau wai lagi kalain tampat mancari nang lain. Dapat 10 lungguk gin anak haruan, parak hibak pang bakul. Cukup hagan lauk makan hari tu. Anakan haruan nik apa nyaman di ulah payis, campuri niur, andari saikit garam, bungkus awan daun pisang. Banam ka bara api. Huiii saja nyaman makan awan banyu asam. Salain nintu, di randang karing karing gin nyaman hajak jua di ulah lauk.

     Salain anakan haruan, anakan ikan lain gin ramik hajak jua di tangguki, anakan sapat, anakan papuyu, anakan kali. Taga anakan ikan lain2 ni hidup bahamburan. Taga amun rajin, banyak hajak jua baulihi. Bacampur campur macam2 anakan, ada nang halus, ada nag hudah ganal. Mun nang taganal tu, tapaksa pang di siangi, di buangi tahik parutnyak hanyar di masaki. Mun nang haloi halui tu, kada payah, tarus hajak di masaki. Kaitu pang bagana di bandang nik, dari sahalui halui ikan sampai saganal ganal ikan, samuwaan di makan. Tu gin kada jua mau habis habis. Itulah kebasaran Allah Taala mambarikan razeki kapada manusia.

Mahancau

90-MAHANCAU.

       Satu lagi cara urang bahari mandapati ikan ialah mahancau. Hancau di ulah dari banang jaring, bamata halui halui. Ganalnya labih kurang 2 dapa x 2 dapa, ampat sagi. Tiap tiap panjuru ada bilah buluh, 4 batang samuwaan, bacantum di tangah. Imbah tu ada sabatang lagi buluh ganal hagan pangangkat hancau. Bila handak mahancau, tanggalamakan jaring hancau ka dasar parit. Hadangi babarapa minit, agak agak ada ikan babuat di angkat tai lakas lakas ka atas. Nasib baik amun ada ikan, manyangkut pang. Tabuat ikan ka dalam jaring. Mun kadida ulangi lagi babarapa kali. Mahancau ni macam nasib nasiblah jua. Ada razeki, banyak pang baulihi. Kadida rezeki, sampai lingu, panat, kasana kasini mahancau, kada jua baulihi. Nasib nasibla. Taga biasanya amun banyak baikan, sakurang kurang baulihi hajak, mayuk hajak hagan lauk makan tangahari awan makan malam. 

Manjurai

89-MANJURAI (Maulah jala).

     Kuitan ku(Ayah) bahari kada suwah manukar jalak, ayahku maulah saurang hajak pang. Bolih di katakan satiap musim ayahku manjurai jalak, jadi satiap musim pang jua baganti jalak hanyar. Olih karana ayah bisa, aku gin jua jadi bisa. Karap hajak aku manulungi ayahku manjurai jalak. Ramik ya am. Duduk hajak, tangan rait rait turun naik manjurai. Walaupun bisa baulah jalak, taga ayahku kada suah hagan bajualan, hagan mamakai surang hajak. Tu pang gawian ayah ku di masa lapang. Amun sudah wahini, tahoam tu, bisak juakah lagi aku menjurai, mau hajak kalumpanan hudah, lawas ya am, hudah labih 30 tahun dahulu. Lagi pun tampatku wahini di Felda, di mana handak manjala. Lainlah di bandang, mimang banyak parit hagan manjala. Bolih di katakan satiap bigi rumah musti ada jalak. Satu kaparluan utama hagan manangkap ikan.

Malonta (Manjalak)

88-MALONTA (MANJALAK).

     Malontanya satu lagi cara manangkap ikan nang popular. Ada banjar nyambat lonta, ada jua nyambat jalak. Banjar katurunan ku nyambat jalak. Jalak di ulah dari banang di jurai samacam jaring, haloi di atas, batali panjang hagan mingkuti, makin ganal kabawah. Di bawahnya ada batu jalak di ulah dari dawai ganal atau timah di susun bakait kaya rantai. Lagi ganal jalaknya, lagik barat pang jalaknyak. Aku masa haloi bahari kada tatibar jala kuitan ku, ganal awan baratnya. Amun manimbai, banyak talungguk pada taurak. Silap silap awan awak nang bajatun ka parit. Taga saja ramik manjala nik. Lagi lagi manjala di parit, waktu banyu bandang tangah di buang ka parit. Banyak ba ikan. Amun bisak manjalak sakali timbai tarik bapuluh ikung ikan pang baulihi. Nang banyak nya ikan sapat, taga sakali sakali ada jua baulihi ikan haruan, ikan kalik, ikan papuyu, hundang galah, bamacam macammai lagi. Saja ramik. Sapagian manjala mau satimba ganal baulihi. Ingat banar aku bahari puas makan ikan bandang nih. Bulih katakan kada suwah manukar ikan laut. Hari hari lauk ikan bandang, sapat, haruan, kali, papuyu, macam2 mai lagi. 

Manajur

87-MANAJUR.

      Salain maunjun, mamasang tajur labih kurang kaitu ai jua. Manajur kada payah di tunggui, udah siap di pasang umpan, cucukkakan tantaran ka higa parit, pasang banyak2 gin kada apa. Pasanglah 10 kah, atau labih kah, kada kira ai, barapa hajak nang di kahandaki. Imbah tu tinggalkan nai bulik, atau bagawi lain. Sudah 3 ka 4 jam kainak hanyar di tuntie, di lihati tajuran, adalah nang manyangkut. Amun banasib baik, 10 tajur nang di pasang samuwaan manyangkut. Tapi jarang banar samuwaan kanak, salalunya 2 atau 3 buting jua nang kana. Tu gin kakadang ngalih manarik tajurnya. Balilit lilit tangsi di bayirnya kapadang rumput di banyu. Manajurnya biasanya di parit nang tagah. Di lubangi saikit kawasan tagah tu hagan maulur tajur. Tu pang tajur karap talilit di padang rumput. Amun nasib kada baik, tajur tapulilit, ikannya sudah kadidak atau sudah mati kalamasan kada hingkat bahinak. Tanggalam di bawah banyu. Nasib nasib lah. Manajur ni biasanya arik patang parak sanja, esok papagian hanyar maitihi. Ramik pang amun banyar baulihi.

Ma'unjun

86-MAUNJUN.

     Amun kadida gawian lain nang di ulah apa ramik maunjun. Unjun ni haloi hajak, tantarannya dari buluh halui, batali tangsi halui awan mata kail nang halui jua. Maunjun hagan mandapati ikan papuyu awan kali juaam. Jarang jarang haruan nang hakon mamatuk. Umpannya biasanya cacing hajak. Dah siap handak maunjun, siap andaki cacing di matakail, hulurakan nai lagi ka parit. Cari kawasan nang tagak banyak ikannya. Hulur tanggalam labih kurang 2 ka 3 kaki. Hadangi hak satumat. Amun adak ikan nang handak mamatuk, karasanan nai, gujut gujut ikan mamatuk umpan. Amun udah tarasa di bayirnya, di simbat tai lagi ka atas. Nasib baik dapat ikan kali atau ikan papuyu. Nasib kada baik, umpan cacingnya habis, ikan nya kada baulihi. Di bandang banyak jua ikan sapat, tapi ikan sapat kada handak mamatuk umpan cacing, muntungnya haloi ya am. Mun ada nang mamatuk gin karap talapas hajak, kada mau barikit di matakail. Tu pang gawian maunjun ni sagan ramik ramik hajak, kada tapi popular. Banyak cara lain mandapati ikan ikan di bandang nih.

Mangalau

85-MANGALAU.

      Bagana di bandang ni ada musim. Musim mangalau salalunya wayah banyu bandang banyak. Sabalum mananam atau hanyar imbah mananam banih. Masa tu lah jua banyak ikan haruan. Ramik pang amun banyak baulihi mangalau. Kada habis hagan mamakan harituk, hingkat hajak di ulah ikan karing.

      Kalau ni sama hajak awan unjun, taga ia labih panjang. Kalau di ulah dari buluh sapanjang 4 ka 5 dapa. Sapanjang panjang sabatang buluh tu pang. Ganalnya di pangkal labih kurang saganal ibu jari batis. Buluh ngini mimang janis nang biasa di ulah buluh kalau. Talinya tali tangsi nang agak kasar saikit. Mata kawatnya gin ganal jua. Muntung ikan haruan jua nang muat managuk. Tu pasal umpannya saikung katak, sadang sadang hagan sapangalauan. Kabanyakan nang mangalau nik urang tuhak, atau kakanak nang sudah ganal. Kakanak haloi kada maangkah manimbai kalau, apa barat. Siap handak mangalau, badiri ai di higa paranggan, pingkuti batang kalau, pangkalnyak di andak atau di dikapittakan di calah paha. Di timbai mata kawat baumpan katak, di bayir, di umbak umbakakan gamat gamat di atas banyu. Amun ada ikan haruan di situ lakas pang inyak manyambar. Bila sudah di sambarnya, hijaakan satumat, agak2 di bawanyak bukah, di simbattai lagik batang kalau. Nah barikit pang ikan haruan di mata kawat. Amun haloi haruan nang mamatuk, jauh pang malayang ka atas. Amun haruan ganal nang mamatuk, bah bilang lantur buluh kalauan. Silap silap mau hajak patah. Saja ramik mangalau nik.

Manyuluh katak

84-MANYULUH KATAK.

      Katak salaluk kaluar malam malam. Lacung lacung di higa higa jalan, di paranggan, di halaman gin adak. macam macam janis katak nang ada. Taga nang salalu di tangkap janis katak minyak juaam, katak hagan mangalau. Amun rajin mayuluh katak ni, apa baduit pang, hingkat hajak di jual, ada hajak nang manukari. Taga aku amun manyuluh kada suah bajual, hagan saurang hajak. Dapat labih kurang 10 ikong gin mayuk. Tujuan katak ni hagan umpan mangalau haruan banarai.

     Manyuluh katak ni bahari jarang makai suar. Suar kana nukar bateri, baterinyak mahal. Kada mantuk mudal. Jadi manyuluh awan lampu curung minyak gas jadiam. Lampu minyak gas ni, di curungi awan cuntang. Ulahkan tangkingnyak. Jadik kadak mudah pajah di tiup angin. Kaitu pang gawian kakanak bahari, ramik bacari katak nih. Lagi amun banyak kakawanan, lagi ramik, kada takunanan. Kada karasanan jam udah labih pukul 12 tangah malam.

Manimba

83-MANIMBA.

      Bahari amun banih sudah ganalan, sudah mula kalacongan, maka banyu bandang di buang di karingngakan. Jadi segala ikan ikan babuatan pang kadalam kolam kolam atau parit parit. Kabanyakan bandang urang bahari, di tangah tangan bandang ada di ulah kolam. Tujuan utamanya hagan manciduk bulanak hagan manampak banih samaian. Salain tu hagan mangumpulkan ikan pang. Tu nang ramiknya. Tiap tiap musim pang kolam kolam ni di timba jua, di karingkan banyunya. Nyaman handak manangkap ikan ikan nyak. Ikan haruan, sapat, papuyu, kali, tu pang nang biasanyak. Maka ganal ganal ikan nyak. Kabanyakan ikan ikan ni hagan simpanan di ulah ikan karing awan di ulah wadik. Taga amun talalu banyak bolih hajak di jual, banyak hajak urang nang suka manukari. Taga kuitan ku jarang hagan bajual, samuwaan pang di ulahnyak wadik awan ikan karing. Simpanan hagan lauk samusin (8 bulan) lagi babandang.

     Caritak pasal manimba nik, ada caranya. Tim panimba di ulah dari tim minyak ampat sagi. Batali ampat panjuru, 2 di hadap kiri awan kanan, 2 lagi di balakang timba kiri awan kanan jua. Bila manimba kana badua pang, surang di sabalah kiri inkuti dua tali, surang lagi di sabalah kanan 2 tali jua. Maka di hayun pang baimbai, cedok, tarik, lapaskan banyunyak ka atas, ka tampat lain. Hayun hak salagi kada uyuh. Amun ganal kolamnya mau 2 ka 3 jam pang hanyar karing. Sudah karing banyunya hanyar nyaman maipie ikannya. Ramik banar pang baharik. Wahini kadidak lagi dah. Mun ada gin urang wahini guna injin manimba.

Makanan

82-MAKANAN.

     Kaluarga ku bahari amun makanan ni baimbai pang nang ada di rumah tu. Jangan pulang ada nang handak badahulu atau badudi dudi, kuitan ku kada suka. Amun makan musti baimbai ujarnya, jadi kina lauknyak sasamaan mamakan, saikit sama saikit, barataan marasani. Amun kada baimbai kaluku nang tadudi apa tinggal kuah haja lagi, tu nang kuitan kada suka. Bahari makan duduk basilaan, kadida babangku bameja. Piring makan gin sudah batanta, kada magan tapahurup awan ading baading. Aku ingat lagi piring makan ku bawarna kuning, di higa bawahnya ada batanda bulat hirang batagar. Maalum lah piring bahari piring zink janis ayan. Mun sudah kalawasan mamakai apa batagar pang. Panyudah nya balubang lubang. Bila imbah hajak makan, maka piring kana basuh saurang. 

      Mimang sudah paraturan nang di tatapkan olih kuitan. Kaitu pang rutin harian makan, bagus jua makan di piring surang, imbah makan tu basuh surang. Aku cuba ai lajari anak anak ku kaitu wahini, tapi kada tapi paasian jua. Amun di suruh hanyar mambasuh, amun kada di suruh... di andaknya hajak pang di dalam sinki tuh. Umaknya jua kainak nang mambasuhakan.

Bacari kayuk apik

81- BACARI KAYU API.

      Bahari hidup di bandang ada bamusim. Amun bandang sudah imbah batanam, maka gawian gin jadi kurang. Wayah tu lah urang tuhak tulak ka hutan, bacari kayu apik. Maka hutan bukannya parak, maniga, ampat batu jua ai jauhnya. Kayu nang di cari bukannya haloi haloi, saganal sapamalok, panjang sadapa. Bawa bulik bamutu 3 atau 4 tatak sakali bawak. Sampai di rumah di tatak lagi di handapi. Nang sadapa tu di tatak bagi 3 lagi, jadi sadang sadang pang hagan manyurung ke padapuran. Sudah di tatak, di balah balah pulang awan kapak.

      Aku bahari rajin hajak mangganae mambalah balah kayu api nik. Ramik rasaknyak, prak... prak.......tabalah haloi haloi amun kana caranya nyaman hajak mambalah. Sudah siap di balah balah, maka di jamur pulang di karing ngakan. Udah karing, di susun, di simpan di barumahan atau di tampat nang kada kana hujan. Kayu kayu apik nik kana banyak pang basimpanan, cagar tahan kagunaan sakurang kurangnya 6 bulan. Amun sudah sampai musim gawian banih kinak, banyak gawian, kaluku kada kasawatan bacari kayu apik. Kada bakayu kada baasap pang dapur. Kada baasap dapur...apa kada makanan pang jawapnya.

Bamasak di dapur kayu

80-BAMASAK.

     Baharik bamasak bukan kaya wahini, makai gas atau karan. Bahari bamasak samuwaan guna dapur atang atau dapur kayu. Bahari manjarang banyu, bamasak nasik, barandang lauk, samuwaan badapur kayu. Maka hirang pang buntut cirat, buntut kuantan, buntut rinjing, mapa ngitu ai, di tanggar ka api kayu ya am. Kada kisah pang ngitu, asalkan makanan nya masak, nyaman di makan. Saja banaran, bamasak nasik di dapur kayu lagi nyaman pada di dapur karan atau gas. Di dapur kayu ada bakarak, tu pang nang nyamannya, tambah lagi amun makan bakuah kari.

      Amun bamasak, kayu api kana cukup pang karingnyak, kada magan ba’al, mun kadak ngalih pang apik handak banyala, satutumat pajah, asap hak nang banyak, apiknya kadidak, tuhuk pang muntung maniup awan pancurung buluh. Bilang hirang pang jua muhak takana habu awan asap. Lubang hidung gin hirang pang jua, tahiut asap bamasak. Mapa ngitu ai, kaitu pang urang bahari ngalihnya hidup mangganal kan anak anak. Sungguh gin kaitu, kakanak bahari rajin rajin, bisa mangganaie kuitan di dapur. Amun kakanak wahini banyak dah nang kada taho bamasak kaya itu badapur kayu.

Bakamih

79-BAKAMIH.

     Soal bakamih orang bahari kada kisah, kada payah ka jamban. Mun nang tuhaknya di palimbahan pamandian pang. Mun nang kakanakan ni, asal turun hajak dari rumah, bakamih hak di mana mana, pancuttakan hajak. Amun kulir turun katanah dari tingkap gin boleh hajak pancuttakan ke tanah.

     Lagi satu tampat istimewa pangamihan di palimbahan dapur, di tampat pambasuhan piring. Di situ memang ada lantai nang jarang sa ikit, hagan lubang pangamihan. Amun arik malam malam, nang tuhak gin bakamih di situ pang jua, nyaman pang, badangkak hajak, surrrrr ke pacirin di bawahnyak. Tu ada carita urang bahari, ada urang macal nang suka maintai bibinian bakamih di palimbahan dapur. Nahap banar pang maitihi dari bawah pacirin. Tu lah bahari, wahini kadidak lagi dah lukuk, rumah dapur nang batinggi kaitu, bakamih di pambasuhan, ka pacirin di bawahnya.

Bahira

78-BAHIRA.

      Jamban bahari kada kaya jamban urang wahini. Jamban bahari, nun jauh dari rumah, maniga rantai jauhnya. Mun handak bahira, kana ancapi pang bajalan manuju ka jamban. Amun sawat ambil huluk banyu satimba bawa tarus naik ka jamban. Amun kada kasawatan maka kainak am badudik bacibuk, hira akan huluk. Jamban bahari batihang tinggi 4 batang, siap batangga nak naik ka atas. Lantainya Cuma babarapa batang kayu hagan bajajak. Dindingnya guni banarai. Mun badangkak gin magunnai kalihatan muhak urangnya sapa nak bahira. Nyaman nang lain handak taho...eehhh ada urang bahira, hadangi huluk. Bahira tahinya guguran pang ka bawah, balungguk lungguk. Karimutan hulat tahi mahurung manggumpal tahik. Bah amun wahini asa galianan banar pang rasanya maitihi. Taga urang bahari saja haja, salamba hajak, kada kisah bahira kaya itu.

Banyu hagan nginum

77-BANYU HAGAN NGINUM.

    Kabanyakan rumah urang bahari musti ada basimpanan guri ganal, paling kurang gin sabuting. Mun nang tasugih tu ada dua atau tiga guri ganal ganal dirumahnyak. Tujuannya kada lain hagan manadah banyu hujan, banyu utama hagan nginuman. Kabanyakan urang bahari baulah rumah babumbung baanjung, jadinya ada tampat pancuran banyu hujan turun. Maka di situ pang maandak guri. Amun labat hujan, satumat jua panuh pang guri. Cari pang saadanya wadah hagan manadah banyu hujan, di ayan, di timba, di tong, di kuantan, napa hajak wadah nang hingkat di isisi banyu. Hujan bahari barasih banyunya, kada tacamar lagi. Hingkat hajak tarus di nginum kaitu. Kada payah di masaki. Tu pang urang bahari kadadak nang sakit parot, nginum banyu hujan. Hagan mandi gin boleh hajak, kada apa apa.

      Amun arik lawas kada hujan maka mawahnya ai, banyu hagan nginum handak habis. Bahari ada ai paip karajaan, taga jauh banar pang di kuala jalan ganal. Tapaksa pang maangukut bamutu atau babasikal, isi dalam tong. Kaitu pang kahidupan bahari, susah memang susah.

Baangkut banyu

76-BAANGKUT BANYU.

      Banyu hagan bamasak, hagan mambasuh piring, kana maangkut pang awan timba bawa bulik karumah. Bagilir pang ading baading. Sahari mau 10 timba. Tu gin kadang kadang kadak mayuk. Kolam banyu kadalah jauh banar, labih kurang sarantai jua am dari dapur. Taga tu gin lingu jua ai maangkut banyu. Amun ari patang lagilah kana banyaki saikit maangkut banyu, hagan habuan malam. Maalumlah malam kina kadap, lagi pun handak bakamih malam malam nyaman ditampat pambasuhan di dapur hajak, kada payah kaluar. Rumah bahari kabanyakkan nya tinggi tinggi. Dapur gin tinggi batihang. Jadi amun babasuh atau bakamih, kabawah barumahan dapur pang luncurnyak, ada pacirin di bawahnya. Maka hirang banyunyak. Ehh hai, amun wahini asa galianan pang malihat. Taga urang bahari kada kisah samuwaan tu.

Batatapas

75-BATATAPAS.

      Bahari mana ada misin basuh. Amun handak batatapas, bawak hajak purukan nang igat tu ka pinggir parit atau talaga. Bawak ayan ganal awan sabun buku cap kapak. Nah di santal lai lagi di dalam ayan babanyu sabun tu. Gosok pakai tangan, amun ada brus plastik tu, kira harat lah sikit, lakas pang lingis daki nyak. Siap gosok, culup pang lagi ka dalam parit ampat lima kali, sampai kadada lagi babuih. Imbah tu di pilas awan tangan. Amun kada kuat mamilas, jajak hujung kain tu, hujung nang sauting pilas awan tangan, pilas sakuat hati, sampai calucuran banyunya kaluar. Sudah jadi ba’al, bawa ai lagi bulik, di jamur di dadaian. Amun arik kada hangat, ba’al pang sampai ka patang. Amun kadida babaju lain, puruk haja ai baju ba’al tu, panyudah nyak karing hajak di awak.

Mandi batajun

74-MANDI BATAJUN.

     Orang bahari kadida ba bilik pamandian. Kabanyakan nyak mandi di sumur, di talaga atau di parit ganal di pinggir jalan. Kadida rasa malu gin baik lalaki atau bibinik. Amun nang lalaki, lagi kada kisah, tulih kiri kanan, kadida talihat urang, napang lagik, pacul lai kain tuala, batajun pang tarus ka dalam parit, brlummmm........ dah tajun siapa lagi dapat maniring. Muhak Kapala hak lagi tacungap cungap. Basabun gin di dalam banyu hajak, kada payah naik. Sudah siap beculup, banyalam dua tiga kali, haa siap dah mandi. Amun nang babini salalu nyak batajun batapih pang. Batapih batik di ikat di atas dada. Bilaa dah batajun tu, kaya apa handak manggosok awak, tantu ai di buka ikatan tapih, gosok sana, gosok sinik, sampai lingis daki. Amun ada yang maintai, bah.... rami banar pang urang tu.

Guring bakalambu

73-GURING BAKALAMBU.

     Bahari amun kada bakalambu, kada hingkat guring, sunging talinga awan nyamuk. Habis pang bintatan awak, muha, habang habang, gatalan di igut nyamuk. Amun bintatan di igut nyamuk, napa ubatnya, sanang hajak, kasai awan minyak gas, tu lah ubat yang paling mujarab dan sanang mancari nyak. Culup haja jariji ka minyak gas di lampu palita, kasaiyakan tarus ka tampat nang gatalan toh. Guring gin kada suah batilam, tu pang batikar bingkuang, babantal kakabu. Bantal tu amun handak guring jangan tapahurup awan ading baading, mau bakalahian. Ya aii..... masing2 bantal sudah batanda awan bakas banyu liur basi, bapata balingkar lingkar, bau harok masing2. Kada tafikir handak manapas saurang. Samuwaan mangharap umak. Amun di hijaakan mau batahun hanyar batapas. Amun di randam di dalam ayan, hirang pang banyuk nyak, kaya banyu pacirin.

Malihat Uwak handak ka Makkah

72-MALIHAT UWAK HANDAK TULAK KA MAKAH.

       Urang bahari tulak ka Makah, naik kapal laut. Kada kaya wahini naik kapal tarbang. Bahari naik kapal laut ka Makah ujar nyak mau labih sa bulan hanyar hampai, kada kaya wahini naik kapal tarbang 10 jam jua am udah hampai. 

       Kaganangan uwak ku bahari handak tulak ka Makah, maka banyaknya parsiapan handak di bawa. Mambawa baras saurang maka banyak nyak, mandua guni, gulak lagik, tapong, ikan karing, pakaian macam macamai lagi samuawaan bawa saurang dari rumah. Ia ai pancang lawas yang am maninggalkan rumah. Bahari kaparluan kaitu kadidak bajual lukuk di Makah, mun ada gin talalu mahal ujar urang bahari. Labih baik mambawa surang hajak dari rumah. Tambang naik kapal laut kada lah talalu mahal. Taga uyuh pang manyahani barang kaparluan tu turun naik. Mun dah tuhak mimang kada larat pang. Tapaksa pulang mambagi upah ka urang nang anum atau pakarja di sana maangkatakan. Bagitu cakalnya urang bahari handak ka Makah, manunaikan rukun Islam nang ka lima toh.

Aroh Manyalamat

71-AROH MANYALAMAT.

      Aroh manyalamat ni ujar urang malayu kenduri doa selamat. Urang banjar bahari dah jadi kabiasaan napa haja satu satu pakara hanyar handak di ulah maka di ulahahakan aroh manyalamat dahulu. Contohnya handak maulah rumah hanyar, handak tulakan ka Makah, handak baaruh ganal bakakawinan, bini handak baranak, anak handak basunat, anak handak batunangan, handak pindahan katampat lain, macam macamai lagi. Amun manyalamat parkara haloi, Arohnya biasanya di ulah waktu pagi hajak, pukul 8.00pagi. jamuannya gin ringan hajak, salalunya kueh gayam makan awan roti, banyuknyak teh O panas. Atau pun pulut putih bakukus, cacah awan hinti ngiur bagula habang. Aku rasa bangsa lain kadida baulah pulut kaitu, urang banjar jua am nang tahu. Aroh manyalamat ni manyaruani urang gin kada banyak, sakitar jiran jiran parakan hajak. Adalah dalam 10 ka 15 urang, itu sudah cukup. Nang panting doa awan hajat tuan rumah itu di sampaikan. Itulah tandanya kita ni amat amat bersyukur kapada ALLAH  swt. Napa haja sasuatu handak di ulah maka mamohon rastu dahulu. Hanyar hidup di barkati Allah.

Aroh Bahaul

70-AROH BAHAUL.

    Aroh bahaul ni amun urang wahini manyambat aroh batahlil, hagan si mati (arwah). Bahaul bamaksud aroh satahun sakali salapas kamatian sasaurang. Urang banjar memang dah kabiasaannya maulah aroh kaito. Bila mati hajak sasaorang tu, maka warisnya mula maulah aroh dari malam ka satu, malam kadua, malam katiga. Malam ka saminggu, malam ke25 hari, imbahtu malam ke 40. Nang ganalnya aroh manyaratus, ia itu ganap saratus hari si mati maninggal. Imbah tu hanyar satahun sakali maarohi, tu nang di sambat aroh bahaul. Biasanya aroh bahaul ni di adakan waktu tangahari atau waktu malam imbah magrib. Maka di pimpin bacaan tahlil awan doanya olih Imam atau sasiapan gin nang bisak. Nang lain nik duduk pang bakuliling di dalam rumah, maamin nakan. Biasalah, imbah hajak siap doa maka makan gin di hidangkan. Maka dudukan lah mahadap makanan batiga atau baampat sapahidangan. Kaitulah caritanyak.

Silat Pangantin

69-SILAT PENGANTIN.

     Bahari amun pangantin basanding ni kada katinggalan ada urang manyilati. Silat pangantn ujarnya. Bukannya silat hagan balawan, Cuma silat parsambahan di hadapan pangantin. Samasa pangantin dudukan di palamin di halaman tu, maka di buka ruang di hadap pangantin. Surang demi surang pang mana mana nang babakat mamparsambahkan silatan. Bah bilang rami ai malihat. Lagi pun kita kakanakan ya am lagi wayah tu. Wahini kada tapi suah lagi talihat pangantin di silati. Tahoam amun di pandalaman sana, mana masih ada banyak urang banjar atau jawa, munkin ada hajak lagi yang mawarisi budaya silat pangantin ngini. Mudah mudahan ianya kakal sebagai budaya kita urang banjar.

Pangantin bausung

68-PANGANTIN BAUSUNG.

     Bahari amun ada orang baarohan pangantin ni mimang ramik banar, mariah kada kaya wahini. Urang gin banyak datangan, nang tantunya handak malihat pangantin. Urang wahini kabanyakannya, imbah hajak makan tarus mancarie tuan rumah handak basalaman (salam karukut), tarus bulik, kada mahadangi pangantin basanding. Tu pang wahini amun lambat pangantin basanding apa kada baurang lagi pang malihat. Amun bahari ramik malihat pangantin nik. Adat banjar siap bausung lagi. Pangantin lalaki nyamannai duduk hajak babarangkang di atas bahu si panyahan. Mun pangantin babini kayapak, duduk pang bakapit di sabalah bahu si panyahan. Ramik pang si panyahan dapat mausung pangantin babinik. Si payahan tantu lah nang tagap2 urangnyak, mun tidak kayapak, kaluku kada tausung pangantin nang ganal.

      Maka pangantin gin di arak bausung, nang lalaki dari jalan, nang babinik dari tangga rumah manuju ka jalan, maka di tamuakan di atas usungan masing masing. Marcun papan nang panjang di gantung atas dahan hampalam gin di likit, kalatupan, sunging talinga.  Juru gambar pang bilang kalilapan manangkap gambar. Suara DJ gin bilang sarak sarak aur banyak mangaradau hajak baucap, sabuting 2 jua am nang bujur. Pangantin gin tarus di arak bairingan manuju ka palamin nang di ulah khas di halaman. Nyaman urang ramai malihat. Maka pangantin gin di turunakan dari usungan, handak di sandingngakan pulang di bangku palamin.

Bapantolan

67-BAPANTOLAN.

     Satu lagi acara nang ramik masa pangantinan bahari ialah bapantolan. Ngini gin urang2 banjar tatantu jua nang maulah. Sabalum lagi majlis pangantinan balangsung, tuan rumah sudah maulahkan mamacak tihang nibung nang di tarah licin. Tingginyak labih kurang 20 kaki. Di puncak tihang nibung tu di andaki kayu bapalang 4, imbahtu di gantungi awan hadiah hadiah, macam macamai, ada tuala, kain2 batik, palikat, barang2 plastik, duit gin ada di kibar kaya bandera. Tu yang garigitan halihat handak maambil. Tihang nibung pulang di saluti awan minyak gris, maka licin banar pang.

    Tiba hajak hari kemuncak majlis parkahwinan, di tangah 2 urang kabanyak tu, maka datangan kumpulan 4 orang pantol, sarusup sarusup dari padang tagah sambil manakutani urang ramai tarutamanya kakanakan. Banyak pang kakanakan nang takuciak katakutanan. Mapa kadak takutan pantol nya kada kaya rupa urang, babaju basalawar buruk koyak2, dua tiga lapis, ada nang babaju guni. Muhak pulang di caloring kaya hanto. Amun kada gin mamakai topeng hanto, bah mambari takunan banar. Lagi lagi amun ia maiti imbah tu baparagah handak mangapung awan manangkap. Takuciakan pang urang. Mun bibinik lagi kada wanik mamaraki, samuwaan bapatak di dalam rumah, mun maintai gin dari jauh2. pantol ni sukak banar maudak urang ramai. Tu lah gawiannya maramiakan majlis parkahwinan.

      Kamuncak nyak si pantolan ni mula mamanjat tihang licin. Saikung dami saikung cuba mamanjat, samuwaan nya tadangsar, tabalurut kabawah. Kayapak nak mamanjat tihang licin kadida bapingkutan. Awak pantol gin batambah buruk, bagalumang awan minyak gris. Macam bubungulan ada jua. Jangan ada nang cuba cuba mamaraki, mandingus pang pantol manakutani, kononnya pokok pinang licin tu sudah kapunyaan nyak, kada bolih lagi urang lain maambil. Bilang bajam jam pang pantol cuba mamanjat tihang licin. Mimang kada hingkat mamanjat surangan. Ahirnya pantol tu hingkat jua maakali, pantol nang ganal dahulu badiri dibawah, maikup tihang. Pantol kadua mamanjat bajajak di bahu pantol patama. Pantol katiga pulang mamanjat bajajak di bahu kadua, baikup tihang nang sudah makin tinggi. Pantol ka ampat nang tahaloi awak pulang mamanjat sampai hinkat bajajak di bahu pantol katiga. Bah bilang galitiran pang pantol nang di bawah tu manahani kababaratan nang lain manjajak di atas. Mapa ngitu ai. Kaitu hak caranya nang hingkat di ulah. Las sakali pantol ka ampat tu nang hingkat manjapai kayu palang di atas, tarus sai lagi bapiruhut mamanjat. Dah dapat saikung di atas tu nang 3 lagi tu turunan nai kasukaan. Sabuting dami sabuting hadiah di gugurkan kabawah sampai habis. Jangan ada nang lain cuba mamaraki. Hadiah2 tu mimang samuwaan hagan si pantulan. Dah habis di turunkan, pantol nang saikung tadi, bagalungsur pang turun nyaman hajak, tihangnya licin ya am. Saja ramik majlis pangantinan bahari. 

Mandi bapapai

66-MANDI BAPAPAI.

     Salah satu adat urang banjar bahari ialah mandi bapapai. Wahini sudah kadida lagi urang maulah kaitu. Amun ada pun munkin di nagari Banjar Indonesia sana pang ada lagi. Di malaysia ni rasanya kadida lagi dah. Lagi pun mandi bapapai ni hanyalah adat katurunan satu satu kaum banjar bahari. Kada di tuntut oleh ugama kita. Aku nak mancaritakan pasal bapapai ni, kurang tahu. Nang aku ingat masa aku haloi banar bahari jua am ada suah talihat. Sabalum lagi acara basanding sabujurnya, kadua pangantin di mandiakan dahulu olih bidan. Mandi di dalam satu macam sarubung, labih kurang 10’x10’ ganalnya, batihang 4 bilah kayu atau buluh. Di hatapi awan tapih batik lapas. Di kalilingnya di pagari awan tali rupia nang di gantungi hiasan awan bunga bunga pinang. Jadinya 2 pangantin awan bidan jua nang ada di dalam. Mandi pulang di tangah ruang halaman. Bah kaliling pang urang maitihi. Amun ikutkan asa supannai luku pangantin, tapi apa nak buat sudah adat kahandak urang tuhak bahari. Pangantin mandi gin siap ada doa doa awan bacaan tatantu oleh bidan. Mandi di cucuri awan banyu bacampur bunga nang di tadah awan upih pinang silih baganti. Kamuncak mandi nyak. Bidan andaki sabigi hintalo hayam di hadapan kedua pangantin. Bila bidan suruh haja jajak, barabut pang kadua pangantin manjajak, siapa dahulu hingkat mamacahkan. Kada taho jua lih aku napa tujuannya maulah kaitu. Bararamian banarai lukuk. Tu lah satu adat banjar yang aku ingat, kada lagi di amalkan wahini.

Urang Aroh Bakawinan.

65-URANG AROH BAKAKAWINAN.

       Urang aroh bahari mimang ramik, meriah, kada kaya wahini. Bahari baaruhan ni cara bagutung ruyung pang sakariahan (sakampung). Biasanya nang tuhak tuhak jadi tukang masak awan manyiapkan samuwaan bahan nang handak di makan. Nang muda muda atau kakanakan bahari rajin rajin manulungi ba’a’antar talam mahidangkan makanan. Nang muda2 jua nang tukang basuh piring cawan. Bahari baaruhan jarang ada babalai, bakimah kaya wahini. Amun ada gin sabuting atau dua jua jua. Di sambat urang bahari sarubung. Tu gin baulah cara gurung ruyung dari kayu kayu hutan bahatap plastik. Kadidak babangku bamija. Amun makan di bawah kimah duduk pang basila bakalilingan. Ini biasanya amun rumah urang tu haloi, handak babaca doa tahlil awan doa selamat maka di ulahhakan sarubung. Di dalam rumah hibak awan jemputan bibinian pang.

       Cara makan gin bahari kada kaya wahini layan diri. Bahari makanan samuwaan di atari. Kadak kira di mana dipa dudukan, di bawah hampalam kah, di bawah niur kah, di higa rumah kah atau di mana mana sekitar rumah urang aruh tu, asal ada sakurang kurang 3 orang takumpul maka di antari pang satalam hagan makanan. Cukup kada cukup tu pang nang di makan bakongsi 3 atau 4 orang. Taga biasanya cukup hajak. Bila sudah imbah dipa makanan, anak2 muda kecubus ni pang nang manyimpuni, bawa ka tampat pabasuhan. Kaitu pang aruh cara bahari, tuhak mudak bakarja sama.

Malihat Wayang

64-MALIHAT WAYANG.

      Pangalaman pugaan aku malihat wayang di panggung waktu umur 16 tahun. Masa tu sakolah manangah lagi. Taga aku ni janis nang kada kisah pasal sakolah. Sakulah kah kadak kah, urang tuhak gin kada kisah. Pagi sakulah, patang hajak bagawik atau pun balalah awan kawanan. Kawanan gin banyak nang sudah kada sakulah. Tu pang rutin harian ku bahari. Carita pasal malihat wayang nih, yang pugaan aku malihat carita kung fuu Cina. Hari tu Sabtu mimang kada sakulah, aku awan kawanan masuk panggung jam 1.30 patang. Kaitu rupanya dalam panggung, kadap, banyak bangku basusun. Kami dudukan kira parak di hadap, tamurah saikit tiketnya. Mun duduk di balakang, tamahal tiketnya. Bila wayang handak bamula, samuwaan lampu di pajahi, lawang di tutupi, siap batirai awan kain hirang. Maka kadap babanar pang jadinyak. Mahawasi muhak kawan gin kada pinandu lagi. Duduk di hadap jadi malihat wayang kagaganalan pang. Urang2 di balakang bilang kuciakan pang bila ada aksi aksi nang harat. Lagi lagi amun ada aksi baciuman, bah bilang basiul siul pang kariuhan. Ramik, saja ramik malihat wayang. Kada sakali, imbah tu karap hajak pang malihat wayang, asal ada haja paluang, lagi lagi carita tu mimangnya hebat dan ramik.

Tajumpa Hantu

63-TAJUMPA HANTU.

     Antah bujur ka kadak aku kada pasti ngintu hantu. Di satu malam tu aku babiskar surangan, handak manuju karumah kawan. Maka biskar kada balampu, taga ada hajak cahaya samar2 bulan halui. Malihat hajak di jalan, Cuma kada tapi nyata. Arik pulang hujan baribisan. Sambil babiskar aku banyanyi nyanyi konon nak manghiburkan hatik. Kayuh punya kayuh sampai parak puhun kayu birah nang tumbuh ganal di higa jalan, tiba tiba awak asa maramang saikungan, cagatan bulu rumak. Taingat ujar urang tuhak di puhun birah ada hantu suka bagana. Dalam katakutan ku taruskan jua, sampai hajak batul batul di higa puhun birah, tiba tiba talihat sasuatu malintas di hadapan ku. Sarta marta aku jadi katakutan, manggalatar saluruh awak. Mujur jua masih batanaga, ku kayuh biskar salaju lajunya, kada manolih lagi ka balakang, tarus manuju ka rumah kawan. Sampai taparusuk biskar di higa tangga rumah kawan, tarus hajak aku malumpat naik ka rumah kawan tu. Kawan ku jadi kahairanan. Maka sambil manggalatar aku mancaritakan, nang aku tajumpa hantu hanyar tadi.

       Bandanya hirang, labih kurang saganal kambing, rupa bantuk aku kada nyata, pasal kadap di bawah puhun birah. Nang aku hirannya, banda tu malintas kada babunyi, hilang marampuh padang halalang di higa jalan sabalahnya. Amun ia binatang, tantunya babunyi rubus rubus di padang halalang, ngini ranai saranai ranainyak. Napa lagi ngaran nyak ngintuk, amun kada hantu.  Malam tu jua aku kada wanik nak bulik karumah surang. Tarus hajak bamalam di rumah kawan tu. Tu lah pangalaman ku tajumpa hantu. 

Malihat Sarkis

62-MALIHAT SARKIS.

     Saumuran hidup ku asanya tu lah suah sakali bahari malihat pamainan sarkis. Wahini kadida tadangar lagi sudah pamainan sarkis ni ada di Malaysia. Bahari pamainan sarkis ni kira takanal jua, amun ada datang bah bilang bajurut jurut pang orang datangan handak malihat, kada kira nang tuhak kah atau nang anum. Ramik banar pang malihat parmainan sarkis nik. Masa tu umurku sudah 16 tahun jua. Kira baakal jua pang sudah sikit sikit. Tu lah pugaan sakali aku malihat. Salalunya pamainan sarkis ni waktu malam. Taga amon hari sabtu awan ahad ada main sabalah patang. Jadi satu hari tu aku tulak kai bamutu awan abang ku, malaihat nang sabalah siang. Masuk pukul 3, tapi pukul 1 kami sudah sampai. Sabalum masuk tu, balilihat pang dahulu di luarannya. Ada gajah, ada harimau, ada Singa. Kuda gin ada. Tu lah pugaan malihat binatang ganal ganal di dapan bigi mata saurang.

   Cukup waktunya kami gin masukan kadalam kimah nang ganal banar tuh. Oohhh hai kaitu rupanya lih di dalam. Asa asa takajut tai kahairanan. Di mapa lih orang2 sarkis tu hingkat maulah kaitu. Di dalam kaliling kimah tu basusun kayu bangku batingkat tingkat hagan urang dudukan. Nang di hadap saikit duduk di bangku biasa, tapi tikit nya lagi mahal saikit. Di tangah tangah nya ada galanggang parmainan orang2 sarkis. Aku duduk di bangku kayu batingkat di balakang hajak.

    Pamainan sarkis bamula awan mainan ayunan. Bah bilang asa sayup hati malihat orang2 sarkis tu baayun, maluncat,batangkapan dari ayunan sabalah sini ka sabalah sana. Siap bapusing pusing awak, maka kadadak nak tagugurnya. Amun tagugur gin ada jaring ganal di bawahnyak. Imbah tu disimpuni parkakas ayunan, galanggang lain pulang di bukak. Main awan gajah, hingkat pulang di suruh suruh gajah tu oleh tuannyak. Macam macam mai pamainan, samuwaannya ramik. Nang ahir sakali, di pasangnya kandang di tangah galanggang. Kali ni main awan harimau dangan singa. Mau hajak lih di suruh2 harimau tu oleh tuannya. 2 jam satiap pamainan sarkis, asa satumat banar, asa handak malihat lagi. Kaitu pang ramiknyak.

Rabah naik Moto

61-RABAH NAIK MOTO.

     Paristiwa ni balaku kira kira 3 bulan lah imbah bisa manunggang moto. Sudah bisa manunggang moto, bah bilang asa arai banar pang, asa ramik banar. Pantang hajak kuitan baucap handak manukar apa apa. Lakas pang aku manyahuti, handak manukar apa?, ayuhak lakasi aku hakon nai ka kadai. Amun masa balum bisa bamoto, tu kakadang liat jua amun di suruh kakadai, ba biskar hajak ya am, panat, kadai maka jauh jua. Sudah bisa bamoto, wah.....bukan main lakas lagi amon di suruh.

     Satu hari tu, arik jumaat. Aku gin mainjam moto abang ku tulak ka masgit. Abang ku kulir ujarnya ka masjid, jadi adalah paluang aku mambawa moto abang ku. Masa tulak tu, ok hajak salamat sampai ka masgit. Sudah bulik, kada tahu kanapak aku rasa macam tadadas dadas handak lakas bulik. Satat hajak moto tarus brummmmmmm.......mamiuh tali minyak, kalalujuan mambawa moto maampah bulik. Hanyak babarapa rantai maninggalkan masgit, brrruukkkkkksssss.......rabah mambawa moto, kada taho napa pasalnya, bolih tatiba rabah tadangsar. Tatingharap aku di higa moto di pinggir jalan. Umai asa malonya aku, urang makin banyak barantian handak manulungi. Mujur jua aku kada parah, takulingsik tapak tangan awan sabalah lintuhut. Cuma asa padih padih badarah saikit. Nang aku hirannya, kopiah nang ku pakai bilang hancur rabitan, taga ku rasani kapala asa kada apa apa, kadadak luka di kapala, Cuma asa sakit sikit2. tapih nang ku pakai gin kuyak, tu yang lintuhut tagarut tuh ka tanah. Motonya gin kadalah hancor banar, Cuma gearnya bengkok, carmin awan signal pacah sabalah,takulingsit sikit2 awak motonya. Alhamdulillah, mujur jua banyak kakawanan manulungi, hingkat mambawa mutu tu bulik. Aku gin barihat dirumah hajak, kada payah bawa ka kalinik.

Balajar naik moto

60-BALAJAR NAIK MOTO.

     Kakanak bahari kada kaya kakanak wahini. Kakanak wahini ku lihat haloi2 lagi, sudah mula bisa mambawa mutu, ada nang hanyar darjah 3, batis kada sampai lagi, takial kial hingkat hajak manunggang mutu. Maka kalalajuan pulang tuh. Lagi pun mutu wahini banyak kadakak klas, nyaman balajar. Aku bahari mula balajar umur dah 15 tahun. Mutu ayah ku pang nang jadi mangsa. Mutu ayah ku YAMAHA 100 CC, ada klas lagi. Bila ayah ku kadadak hajak, mulalah aku manyatat nyatat, brum... brum....asa rami mandangar bunyinyak. Imbahtu aku waniakan manunggang. Ku picik klas, masukkan gear, bila ku lapas haja, injin gin mati. Bapuluh puluh kali aku maulah kaitu, kada hingkat lagi manjalankan mutu.

     Satu hari tu aku tarai lagi, kali ni kulapas klas bagamatan, minyak ku pulas kuat kuat, sakalinyak mutu tu bajalan kalajuan, tagamam akuk, kada tahu nak ulah apak. Kada ingat pasal brek. Kada tafikir nak manggamatkan bunyi injin mutu. Awak asak manggigil hudah, bunyi muto kakuatan, ahir nya....brussssss.....taparusuk di rimbunan pohon2 pisang di higa jalan. Tabaranti di situ. Baik jua ada pohon pisang nang banyak tu mahalang, kalau tidak, burrrrrr....tacabur pang ka parit ganal di hadapan. Mau baburinik. Mau haja jua aku jadi arwah. Manggigil akuk saikungan awak, mujur jua kada apa apa, kada patah riuk awak. Cuma sakitan singkalan talanggar batang pisang. Amunlah puhun niur kah atau puhun hampalam ka nang ku langgar, mau haja aku mati, kalau tidak pun patah riuk pang awak. Alhamdulilah jua, panjang lagi umur ku.

Balajar Barukuk

59-BALAJAR BARUKU.

      Waktu umur ku masuk 15 tahun, aku sudah mula balajar baruku. Mula balajar bahari barukuk gulung surang hajak. Tambakaunya cap kapal tarbang, kastasnya TST, imbahtu andaki cangkih nang di gunting halui halui. Pamulaan barukuk tu basungkup sungkup pang awan kuitan, kaluku di sariki nya. Salalunya aku baruku di rumah kawan, atau di mana2 tampat batamuan awan kawanan. Kawanan ku banyak nak kada sakulah, aku jua lagi nang sakulah tingkatan 3. tu pang jadi asa supan barukup di hadapan kuitan.

      Sudah habis papariksaan SRP, wahini PMR, aku kada lagi sakulah, dah cuti surang. Aku mula balajar bagawi surang maambilupah manabas parit awan kawanan. Bila dah baduit surang, tu pang jadi mula bisa manukar rukuk sigerit. Bahari rukuk murah hajak, 35sen jua am dapat sakutak nang 20 batang. Lawas kalawasan aku baruku, ahirnya tahu jua ai kuitan ku, taga sarik gin. Bisa bagawi mancari duit surang marahak baruku ujarnya. Bahari aku sakulah manangah ayah ku kada ambil kisah langsung, nak sakulah kah kadak kah. Dah tingkatan 4 mimang karap punting, kada sakulah, tulak bagawian. Amun kada sakulah kada kisah jua ai kuitan ku, lagi di suruhnya bagawi hajak. Taga aku jua nang asa sayang handak baranti sakulah, aku taruskan pang sakulah sampai habis SPM di tingkatan 5. soal balanja gin kada kisah, aku sudah bisa bagawi surang, napa hajak gawian bandang nik, aku biasa hajak. Walau pun aku sakulah, bab baruku ni, kada suah aku mambawa rukuk ka sakulah. Patuh hajak lagi awan disiplin sakulah. Bila dah patang bajumpaan awan kawanan, hanyar barukuan.

Basalawar handap

58-BASALAWAR HANDAP.

      Bahari sakulah kada kaya wahini. Wahini darjah satu gin sudah basalawar panjang. Bahari zaman aku sakulah basalawar handap pang dari darjah 1 sampai darjar anam. Masuk sakulah manangah gin magunai basalawar handap sampai tingkatan tiga. Masuk tingkatan ampat awan lima hanyar basalawar panjang. Bibinik nyak babaju skirt hajak di paras atas lintuhut. Pamarintah bahari balum manitikbaratkan ugama islam lagi ya am. Magun taikut ikut bakas jajahan urang putih. Tu pang jadi kaitu. Bahari soal pakaian ni macam kada kisah mambuka urat. Bibinik amun handak mamakai skit gin bulih hajak lagi hampai tingkatan 5, kada payah mamakai tudung. Taga bibinian ni amun handak babaju kurung di bulih hakan jua ai sasudah tingkatan 4 atau 5. tu gin kada bulih mamakai tudung. Rambut handap paras bahu. Amun barambut panjang musti di ikat kamas kamas.

      Sungguh pun pakaian kaitu kada tadangar pulang bibinik ni kana rogol ka, kana hahar kah. Kada tahu lah nang sabujurnya. Bahari barita ni kurang ya am, surat khabar kada suah manukar, jadi kada tapi taho parkambangan dunia luar. Taga kada ku nafikan jua, amun bibinik sudah tingkatan 4 atau 5 magun babaju skirt, takakadang asa garigitian jua ai malihat, parasaan syok tu kakadang ada jua. Cuma bahari asa kada wani lagi handak mamaraki atau mangurati. Apa lagi handak mambawai batamuan di mana mana. Parasaan ghairah tu simpan hajak pang di dalam hatik.

Cikgu garang

57-CIKGU GARANG.

      Masa aku sakulah manangah bahari, baru tingkatan 2, ada surang cikgu nang garang banar. Ia cikgu disiplin. Maltihi misai nyak haja gin sudah asa takutan, bengis, mimang padan hajak inyak jadi cikgu disiplin. Satu hari tu aku dengan 3 urang kawanan, kada tulak rehat ka kantin, tapi tulakan ka garaj kareta cikgu2 hagan mamandiran. Bujur kami kada maulah napa apak, salain mamandir biasa hajak. Bunyi hajak locing imbah rehat, biasalah kami masukan pulang ka klas masing masing. Kada lawas imbah tu, datang surang pangawas sakulah mahiau ngaran ku dangan kawanan ku tadi tulak ka bilik cikgu disiplin. Asa tatakon takon pang di dalam hati, napa pulang salah kami. Kami gin bejurut ka bilik disiplin. Sampai hajak cikgu garang sudah mahadangi awan kayu batang bangku di tangan nya.

      Kamu semua tadi yang ke garaj kereta cikgu kan. Tadah tangan semua katanya tegas, Pang salapok kayu batis bangku hinggap di tapak tangan kawan ku, surang lagi, pang kana jua tanpa soal jawap lagi, surang lagi pang kana jua. Giliran ku nang tarakhir, pang jua, nak tahu sampai patah dua kayu batis bangku tu. Habang tapak tangan, sakitnya kada takira. Handak manangis asa kada wani, tahani jua lah. Tapi baik jua kadadak nang patahnya jarigi tangan kami, Cuma kasakitan hajak, bisa jua saku cikgu tu maagak kakuatan nya mamukul. Sudah imbah mamukul hanyar cikgu tu mambagitahu, keretanya calar calar di guris awan banda tajam ujar nya. Kami gin tacangang cangang, kada taho napa apa. Salah surang kawan ku madahakan nai ka cikgu tu, bukan kami yang buat cikgu, kami semua tidak tahu. Tapi cikgu tu menjawap, lain kali jangan bermain main di kawasan letak kereta cikgu. Faham........Mimang kami samua kada puas hatik, kanapa kami nang di pukul, padahal kami kada tahok langsung siapa yang mangguris guris kareta cikgu tu awan batu atau banda tajam. Sumpah kami kada tahuk. Satu lagi, sapa nak malihat kami di situ, cikgu ka atau ada pangawas nang badandam awan kami, kada tahu jawapannya. Sudah malang nasib kami handak kana bantai awan kayu batang batis bangku. Satu kanangan yang kada ku lupakan sampai wahini.

Balanja Sakolah

56-BALANJA SAKOLAH.

      Kabanyakan urang bahari susah susah ya am. Aku bahari sudah sakulah manangah gin balanja sakulah RM1.00 jua hagan saminggu. Sakulah 5 hari saminggu, jadi 2 kupang jua sahari. Ayah ku mambagi duit balanja kada hari2. ayah mambagi rm1.00 sakali pada hari Sanayan jua. Imbah tu bisa bisa surang pang nak balanja. Amun habis rm1.00 tu dalam sahari, alamat 4 hari lagi tu kada balanja langsung pang. Nginum hajalah banyu paip di sakulah. Amun ikutkan 2 kupang balanja sahari, cukupai nukar banyu sa galas haloi sa kupang, kuih sa bigi sakupang jua. Amun manukar nasi lemak atau mee atau bihun, sapiring 2 kupang, kada hingkat nukar banyu lagi, nginum hajak banyu paip sakulah...free. tidak pun bawa sango banyu dari rumah, puas nginum. Masa sakulah randah karap hajak mambawa sango makanan awan banyu dari rumah. Sudah sakulah manangah, asa supan sudah. Amun banyu hajak tu kada apa lagi, biasa hajak. Lagi pun papagian dirumah umak kada sawatan manyiapkan makanan hagan sangok. Jadi bawa hanjalah banyu dingin jadiam. Karap haus di dalam klas gin hingkat hajak nginum.

      Taga aku bahari jarang jua balanja di kantin sakulah ni. Kada taho lah nangapa, asa sayang handak balanja, simpani hajak pang duit. Lagi pun asa kulir bakajal kajal, barabut rabut. Suah hajak tu imbah manukar nasi lemak, tasinggung oleh kawan, habis tahambur ka lantai simen. Pada putih hak lagi bigi mata. Amun talambat manukar, kinak locing babunyi magunai kada imbah lagi makan. Maka rehat satumat jua, 20 minit luku. Amun balanja gin saminggu tu sakali atau dua hari jua. Hari lain rehat di balakang2 bangunan sakulah pang awan kawanan yang sama kada balanja.

Sakulah Managah

55-SAKULAH MANANGAH.

      Habis sakulah randah 6 tahun, masuk pulang sakulah manangah. Sakulah manangah ku bahari jauh, parak pakan Sungai Basar. Anam batu jauhnya dari rumah. Babiskar surang pang hari hari. Hari pamulaan sakulah gin aku tulak surang hajak. Kakada ayah maatar. Pandai2 surang pang. Alhamdulillah di tarima hajak sakulah di situ. Di bagi bagi olih cikgu dapat masuk tingkatan 1B, kira bagus jua tu. Samuwaan tingkatan satu hajak ada 8 klas. A,B,C,D,E,F,G,H. Di bagi bagikan maikut kaputusan papariksaan sakolah randah. Nang tapandai tantunya di klas A, sampailah mana nang tabungul ka klas H. Nang kada bisa manulis mambaca gin ada hajak. Mapa ngituai, bahari sakulah kada kira pandai ka bungul tatap naik hajak klas.

      Masuk sakulah manangah tantunya kawan2 gin kawan hanyar. Di Klas 1B, ada 3 orang jua kawan ku nang asal dari sakulah randah nang sama. Tu gin surang jua lalaki, 2 lagi bibinik. Jadi surang lalaki tu pang jadi kawan baik ku. Tapi lawas2 samuwaan nai jadi kawan, kada kisah lagi. Kada takutan lagi. Sakulah randah tagak banyak bahari, sudah manangah pada takumpullam di situ. Tulak sakulah ba biskar pang surang, pukul 6.00 pagi musti dah siap. Karap hajak kada sawat sarapan di rumah, nginum banyu kosong pang. Mapa ngitu ai, salewat lewatnya pukul 6.30 musti dah bagarak. Salalunya 40 minit pang bakayuh hanyar sampai, tu amun kada hujan, jalan kada licak. Jalan bahari cuma jalan tanah mirah, ada tampat tatantu nang habis tanah mirahnya, bah bilang luluk pang amun hujan. Kada hingkat di lalui babiskar. Handak lalu jua kana bajalan batis pang di sahan basikal di bahu. Amun tidak tayar biskar hibak awan tanah liat tasangkut di sayap, apa kada hingkat bajalan biskar. Mimang azap sakulah bahari. Tu pang amun hujan hajak karap pang ponteng sakulah. Kada kaya wahini, jauh banar bezanya. Jalan waahini ba tar baik. Sakolah gin bamutu. Bah kan ada jua nang di antar bakarita. Alhamdulillah.....

Maanyam katupat

54-MAANYAM KATUPAT.

     Bukan samuwaan urang bisa maanyam daun katupat nih. Aku haloi lagi bahari sudah bisa. Mulaan tu aku balajar awan umak tu, tuhuk maikuti, kada mau dapat, kayapak lih ngalihnya, lajuk banar umak ku malajari. Ahirnya aku balajar awan kawan nang taganal saikit pada aku. Nah nyaman pulang balajar, satumat jua am balajar, sudah bisa maanyam katupat. Umai asa rami banar pang. Macam macam janis katupat aku bisa maanyam. Ada ngaran nya katupat burung, katupat sate, katupat bantal, katupat bawang. Tu pang nang aku tahok. Bila handak rayak hajak, aku pang nang rajin maanyamkan daun katupat nih, ading2 ku nang lain kadadak nak bisa nyak, kulir ya am balajar. Masa tu bangga banar pang aku nang pambisanya. Lagi bangga hingkat maulah katupat bawang, umak ku gin kada bisa maulah katupat bawang. Aku balajar awan kawan ku tu pang nang jadi bisa.

     Walau bagaimana pun, jasa umak ku kada ku lupakan. Sagala asas nya aku balajar awan umak ku, karap maitihi umak maulah kayapak. Cuma handak mahuruiakan tu jua am awan kawan. Lagi pun aku tangan kiwak, umak ku kanan, kawan ku tu jua kiwak, tu nang nyaman balajar. Sampai ka tuhak wahinik, ingat haja lagi aku, magunai aku bisa maanyam katupat nih. Binik ku gin kada bisa. Taga wahini kakadang jua am maulah katupat amun arik rayak. Kulir maambil daun niur, pokok nya sudah tinggi. Lagi nyaman manjarang katupat sagara hajak, manukar katupat babungkus plastik di kadai. Taga rasanya tantu kada sama awan nang asli.

Kuih Luyang

53-KUIH LUYANG.

     Sajanis lagi kuih nang wajib ada pada ari rayak bahari ialah kuih luyang. Tiap tahun pang umak ku kada katinggalan maulah kih luyang ni. Kuih luyang ni di ulah dari tapung baras, di adun cair2 mangikut sukatan nang di tantuakan. Umak jua nang tahu sukatannya. Amun cukup sukatan awan parisa katumbar awan bahan lain nyak yang di andaki, maka nyaman banar pang kuih luyang nya. Rangup, manis, manyalirakan. Aku katuju banar bahari mamakan kuih luyang nik. Lagi2 ulahan umakku, asa kada tandingan rasa sadapnya awan ulahan urang lain.

      Maulah kuih ni di randang hajak ka minyak, ada acuan nyak nang khas. Basi tambaga tu ada ba lubang lubang saakan bunga. Handak mulai marandang, hangatkan dahuluk acuan di dalam minyak, dah cukup hangat, culupkan ka adunan tapung tadik. Jangan sampai tanggalam. Adunan nang malakat di acuan tu tarus di buat ka rinjing minyak hangat, di guyang guyang supaya adunan tu tapacul dari luyang nyak. Hijakan sampai masak, hanyar di angkat. Samantara tu acuan tarus di hangatkan, culup lagi ka acuan, buat ka rinjing.  Kaitu pang sampai habis adunan di randang ulah kuih luyang. Bahari ada jua urang nyambat kuih guyang. Tapi urang wahini manyambat kuih bunga ros.

Maulah kuih bahuluk

52-MAULAH BAHULUK.

    Tiap tahun bila handak raya hajak kada katinggalan pang umak ku maulah kuih bahulu. Samacam dah jadi satu kawajipan, musti ada kuih bahulu. Bahari bukannya sanang nak malulah kuih bahulu nih. Maulah cara tradisional. Pamulaan tu mangujak hintalu dahulu di dalam gadur, sampai kambang, imbah tu buati gula, dah cukup kambang buati pulang tapong. Samua mangikut sukatan. Umak ku pang nak taho sukatannya. Aku kada taho. Aku nang rami nya manolong mangujak pang. Bah bilang baliiran pang paloh. Bukannya satumat, kakadang labih dua jam. Salagi umak kada manyuruh ampih, kujak pang taros. Lagi lawas mangujak lagi baik bahulo nyak ujar umak. Kuih bahulu ni   mimang kasukaan ku. Cacah awan banyu teh O lagi nyaman, kanyang pang mamakan.

     Handak mambakar, satu hal lagi, bukan nya sanang. Bahari manak ada oven. Nang ada dapur kayu hak. Sudah siap hajak di tanggar pang lagi acuannya ka atas bara. Panutup acuan nyak gin adaki bara jua. Imbah tu sapui sadikit minyak di acuan bahulu tu, buati ai lagi sadikit sadikit adunan nang di kujak tadi. Tutup awan panutup acuan nang sudah babara. Hadangi pang labih kurang 10 minit. Lagi lawas mamasak lagi capat bahulu masak, sudah cukup hangat ya am acuannya. Api bara masti ki kawal, amun tidak hangit pang. Bah bilang baharian pang salalunya maulah bahulu nih. Dari pagi2 sampai ka patang pang hanyar siap. Uyuh pang kapalakan. Maka puasa lagi. Taga amun sudah handak kada kisah samuan tu. Ulah hajak pang sampai siap. 

Bara'an

51-BARA’AN.

    Sudah manjadi adat orang2 di kampung ku baraan nih. Dari bahari sampai wahini, magunai dipa baraan di pagi Hari Raya. Salalunyak bulik hajak dari masjid tarus pang bakumpulan di rumah Tok Sidang sabagai rumah pamulaan. Adalah labih kurang 30 ka 40 orang, bacampur kakanakan awan urang tuhak. Tapi lalakiannya hajak. Babinian kada bulih umpat. Sudah duduk bakalilingan di rumah tu, maka batakbir lah, amun kada gin barsalawat hajak ka atas Nabi kita saw. Di ikuti awan doa salamat. Maka makanan gin sudah di siapkan awal2 di tangahan rumah. Ada macam2 makanan, ada nag maulah katupat, nasi himpit, lamang. Lauk nya gin macam2 rasa ada, ada masak randang, masak kari, sambal kacang, ada juga lontong. Kada katinggalan kuih2 raya musti ada, biskut awan kek. Ada jua nang manghidangkan buahan. Banyu nya gin macam2. lain rumah lain pulang jamuan makanan awan banyu nya.

    Imbah hajak rumah pamulaan, tarus ikuti rumah kadua. Kaitu pang salanjutnya, sampai habis rumah2 mana mana yang umpat baraan di singgahi. Salalunya habis sampai ka pukul 1 atau 2 patang. Kaitu pang tiap tahun. Rami ai baraan ni. Tapi bahari kakanakan ni kadida orang tuhak atau tuan rumah mambagie duit, kada kaya kakanak wahini. Kakanak wahini nang ia nya mancari duit raya pang. Makan kada tapi hakon. Dah dapat duit raya lakas pang bulik mancari rumah orang lain pulang. Mun kakanak bahari tu pang, makan nang iya nya, hampai buncit parot, karas kakanyangan. Ada nang sampai sakit parot. Ia ai...puasa sabulan, tiba hari raya macam2 di makan dah tu banyak pulang, macam2 di kajal ka parot, mana parot tu kada maragam.

Ari Raya

50-ARI RAYAK.

    Kamuncak puasa arik rayak. Napa nang ramiknyak rayak nik. Bahari malam arik rayak nik bilang kada baguguringan pang. Guring satumat jua am. Kakanakan nang ramiknya mencucuh mariam. Bilang kada singrantian bunyi galanduman basahutan sapanjang malam. Imbah hajak magrib mula rancak galanduman. Nang takurang saikit dah labih pukul 12 tangah malam jua am. Imbah tu, dah subuh rancakkai pulang galanduman di sanak sinik. Mariah mandangar bunyi mariam nih. Marcun kurang bahari, amun ada gin marcun papan tu jua am, kadida marcun atau bunga api kaya wahini. Bunga api bahari gin di ulah dari dawai, babalirang, dilikit hujungnyak, mancalirak pang bunga apinya. Kakanakan halui jua am nang ramik mamain, nang ganalan lagi ramik main mariaman.

    Pagi pagi rayak biasaklah di suruh kuitan mandi lakas lakas, imbah tu pakai baju nang hanyar di ulahkan atau di tukarkan kuitan. Umai asa bangga nyak ai, dapat mamakai baju hanyar. Amun kakanak bibinian tu ada nang babaju bagirap girap. Sukak banar pang mamakai. Nang lalaki babaju kurung (set malayu). Siap basampin lagi tuh. Sabalum pukul lapan pagi, musti kamasjid. Arik tu handak malihat banyak nya urang ka masjid. Kajadian kabanyakan urang, ada nang mambawa sadadah dari rumah, sambahyang sampai ka luaran, hibak di dalam kada kamuatan. Ada ai jua nang datang hajak ka masjid, taga kada sambahyang, ahh ujarnya, sambahyang sunat hak, kada sambahyang kada apa ai.

    Salasai hajak kutbah arik rayak, mula lah baansur kaluaran. Kami nang bagana sakampung nik tarus bakumpulan di rumah sidang di kuala kampung. Kada kira tuhak kah anom, bakumpul di situ. Sampai labih 50 urang. Nih nang di sambat ‘baraan’. Salalunyak mambaca takbir atau salawat di iringi doa salamatan. Jamuan makan sudah di siapkan. Macam2 ada, katupat, nasi tindih, lamang, randang, kari, sambal kacang, kuih kuih, buah buahan, kada kasambatan. Salasai hajak rumah tok sidang tarus ka rumah no 2, satarusnya sampai habis sa kampung mana yang maumpati baraan. Kada kurang 20 bigi rumah, biasanya sampai pukul 1 atau 2 patang pang hanyar habis.

Main mariam

49-MAIN MARIAM.

      Satu lagi nang mariahnya bahari bila parak raya nik, urang main mariam. Galanduman pang di sana sini bunyi mariam. Lagi ganal mariam nyak lagi kuat bunyik nya. Taga mariam ganal2 nik biasanya nak tuhak nang main. Kakanakan kada wani main. Lagi pun kada bisa maulah. Mariam ganal ni di ulah dari batang niur. Batang niur di tatak labih kurang 10 kaki, di balah dua dahulu, di tabuk di bahagian dalam nya, tinggalkan bahagian kulit satabal 2 inci. Imbah tu tangkupakan nai pulang, di simpai (di ikat)kuat kuat awan tali atau awan rantai basikal. Agak2 tahan jangan sampai pacah. Siap sudah mariam, buntut nya di pajal saikit ka tanah, muntungnya di dongakan saikit ka atas. Nah kaya apa handak malikit, mambunyikan. Ulahkan pulang batang buluh andaki cuntang batatak di hujung buluh toh, hagan maandak kabat. Siap hajak buati kabat, curahi sadikit banyuk. Manggurak pang kabat, di surungai lagi ka dalam muntung mariam. Hadangi huluk 3 ka 4 minit. Di cucuh ai lagi lubang haloi di pangkal mariam tu. ‘Booooommmmmmm’ kuatnya bunyi nyak, sunging talinga, asa jadi tuli pang amun kada batukup talinga. Handak mancucuh gin kada wani parak2. Pakai galah pang panjang2. Ikat gulung saikit kain buruk di hujung galah tu, culup ka minyak gas, hanyar di likit, parakkakan ka lubang haloi mariam. Tukupi lubang talinga, kainak sunging.

     Salain dari mariam batang niur, ada jua urang maulah dari batang nibung, buluh haur. Ada jua mariam cuntang di susun hajak di dalam tanah. Ada jua mariam papan hajak. Tabuk huluk tanah labih kurang lebar 6 in panjang 4 kaki, tukupi awan papan tabal, timbusi tanah, tindihi batu2 ganal di atasnya. Asal hajak ada barupa tarowong, balubang haloi di pangkal hagan malikit, jadiam mariam. Lagi ganal mariam, maka lagi hangkoi pang bunyi nyak.

Malam Likuran

48-MALAM LIKURAN.

    Tahoklah malam likuran. Urang banjar bahari manyambat malam 10 akhir ramadan tu malam likuran. Napa nang raminyak. Nang ramiknya mamasang lampu punjut. Bilang tarang pang sakampungan. Tiap bigi rumah mamasang lampu punjut, mariahnyak pang. Ada nang mamasang sampai ka jalan jalan, tarang pang, kada takutan lagi. Kabanyakan urang bahari maulah surang hajak lampu punjut nih. Maulah dari cuntang susu atau pon botol kicap. Sumbu nyak tali guni, banyak hajak bajual bahari. Intang muntung sumbunya tu di gulungkan zink lambut, jadi haratai api lampu nya banyala. Minyaknya minyak gas atau di sambat jua minyak tanah.

    Salain tu ada jua nang maulah dari buluh haur. Ini lagi harat, badirit pang sumbunya. Di andak tinggi tinggi, kaya pintu garbang. Harat pang di lihat dari jauh. Bah bilang balawan lawan pang kakanakan sakampung masing masing balawan harat maulah lampu punjut. Nang tuhak nyak gin umpatan nai jua, malajari kakanakan. Taga tu pang amun ari ba  angin kuat atau arik hujan habis pang pajahan. Mapa ngitu ai. Angin awan hujan kada hingkat di tangati, kahandak Ilahi. 

Mambayar Fitrah

47-MAMBAYAR FITRAH.

     Tiap tahun bila parak ari raya hajak banyak pang urang mambayar fitrah. Ada nang mambayar ka amil, ada jua nang tarus mambagi ka urang urang nang susah di kampung tuk. Masa haloi ayah ku pang nang mambayarkan fitrah. Rami malihat urang mambayar fitrah nik. Amun sudah ganal, sudah bisa bagawi surang, kada lagi kuitan mambayarkan, kana bayar surang pang. Caranya bahari kana manukar baras dahulu atau pun mambawa baras saurang dari rumah. Handak manukar baras kada ngalih kadak. Manukar hajak awan wakil amil, baras nang sudah di kumpulkan olih amil tuh. Bapadah huluk handak manukar baras, imbah tu bayari barapa harga nang di tantuakan. Dah manukar baras tu, di niatakan nai lagi hagan tujuan bafitrah. Julung tarus baras tu ka wakil amil. Wakil amil gin manarima dangan niat nyak. Amun banyak tanggungan, banyak kali pang manukar awan manjulung baras. Di niatakan tiap ikungan nang di tanggungnyak. Kira unik jua tuh.

    Kada kaya wahini, lagi nyaman mambayar fitrah. Kada payah babaras. Julungi hajak tarus duit awan nilai harga baras, barapa urang tanggungannyak, bayar tarus sakali jumlahnyak. Tarus basalam awan wakil amil niatkan mangaluarakan fitrah maikut harga baras sakali harung bagi diri awan tanggungannya karana ALLAH Ta’ala.