Manukar Ais

45-MANUKAR AIS.

     Bahari kadida bapati ais. Kayapak handak ada, karan gin kadida, mana handak mencucukkakan waya nyak. Bila bulan puasa hajak ada pang kawanan yang suka bajual ais. Kawan ku tu bukan nya parak manukar ais, di bagan sungai basar, tampat jeti palabuhan nalayan. Di situ jua ada ais ganal2 bajual. Ais tu sabujurnya hagan manyimpan ikan, jadi adalah gudangnyak. Pukul 2 patang hajak kawan ku tu ka sungai basar, manukar ais, sakatul ganal, bawa bulik babasikal, bukaannya parak, 6 batu, uyuh jua tu babasikal. Tapi sudah rami ayu hajak.

      Ais bahari kada bapati, jadi tapaksa pang di saaluti awan habuk gargajian kayu. Dah sampai ka tampat jualan, di simpang jalan parak kadai urang, di situ pang ia mambuka port. Nah sapa handak manukar ais kana tampah pang dahulu, bayari badahulu, 2 kupang ka, 3 kupang kah, kada kisah asal hajak mayo. Amon talambat batampah, kada marasa pang babanyu ais. Jadi kawan ku tu gin ukur, imbah tu tatak2 ais tu awan gargaji. Kada putus lagi, gargaji saparuh hajak. Di tutupi huluk awan habuk papan. Salaputi pulang awan guni, supaya jangan cair Bila dah parak waktu babuka, hanyar dipa dipa maambil ais tu, di tatak2 putuskan mangikut harga nang di bayar. Handak mambawa bulik gin magunai di salaputi habuk, di bungkus awan karatas. Sampai ka rumah, handak mambuat ka dalam jag, hanyar di basuh ais tu lingis lingis. Umai nyaman nyak babuka banyu ais bila puasa. Dingin rakungan.

Puasa

44-PUASA.

     Bulan Ramadhan, bulan puasa. Maka urang bapuasaan. Kada bulih makan awan minum di siang hari. Tu pang kuitan karap mamadahi, puasa lah...amun hingkat sampaikan ka waktu babuka. Pukul ampat pagi hudah di garak suruh bangunan, basahur ujar kuitan. Umai ngalihnya nak bangun, barat bigi mata. Dah bangun gin takibil kibil pang bigi mata, kamangantukan. Mapa ngitu ai handak basahur. Amun kada makan nginum kaya apak handak puasa, bulih kah tahan saharian. Hakon kada hakun tapaksa jua pang makan, walau kada salira, di kajal jua pang nasi ka muntung. Uyuh mangunyah, amun kada tatalan, hirup pang banyu, talan awan banyu. Asal masuk kaparot. Imbah hajak makan, sambung pang pulang guring. Tu nang karap tatinggal sambahyang subuh. Mana lagi basiap handak sakulah.

    Suwah hajak masa haloi tu aku puasa iyang iyuk. Bararanai kadapur nginum awan makan mana nang sawat. Sudah kada tahan kahausan kayapak. Asa galitiran awak. Asa handak garing. Kuitan kada tahok, amun tahok tuhuk pang di mamaie nyak. Dah taalas parut baparagahan pang lagik, kononnyak puasa pang jua. Inda liut hak konon nyak mahadang waktu babuka. Padahal sudah mambantas tangahari tadik. Kaitu pang kakanakan ya am. Hanyar balajar puasa. Amun dah tuhak maulah kaitu jua, badosa ganal pang. Sudah lah kada puasa, badusta pulang. Haram hukum nyak lih.

Sambahyang

43-SAMBAHYANG.

   Bab sambahyang ni aku balajar nang bujur nyak sudah mula masuk sakolah manangah. Sabalum to sambahyangai jua, tapi kada tapi taho apa bacaan nyak. Main ikut ikutan pang. Amon di rumah, ayah jadi imam, aku bahanu umpatan jua sambahyang, tapi tu lah kada hurui lagi bacaan nyak. Nang tahok fatihah nya jua am. Ayah ku julungi parukonan (kitap urang bahari), tu pang di suruh nya mbaca awan hafalkan surang, kaya apa cara cara awan bacaan sambahyang nang batol. Dah masuk sakulah manangah, hanyar hingkat maafal bacaan sambahyang. Tu gin tuhuk pang maafal. Suah hajak handak sambahyang subuh saurangan, sabalum sambahyang andak huluk kartas batulis ganal doa qunut di hadapan. Nah hingkat mambaca doa qunut dalam sambahyang subuh. Tangah balajar kada apa ai luku, bulih hajak lih.

   Tu pang ruginya aku dahulu, kada di sakolahkan sakolah ugama ya am. Kakanakan lain banyak nang pagi sakulah biasa, ptg sakulah ugama. Aku kada kaitu. Patang salalunya aku di suruh mangganai ayah umak pang baulah napak2 di rumah atau ka bandang. Handak bajalan bahayau gin kada tapi bisa, paasian ya am awan kuitan. Amun di tangati nyak, kada wani pang balalah. 

Mangaji

42-MANGAJI.

     Kakanakan bahari mimang wajib balajar dalam hal hal ugama ni. Tarmasuklah balajar mangaji ia itu mambaca mukadam awan Quran. Kabanyakan kakawanan ku bahari mangaji di rumah tok guru, di hadapan rumah ayah ku tu. Aku jua am sapaadingan balajar awan ayah surang. Ayah ku kada handak malajari urang lain. Kada taho aku kanapa sabab nya. Padahal ayah ku tu mimang pambisaan banar mangaji, nafas nya panjang, suaranya sadap di dangar amon mangaji. Bamarhaban gin bisak banar. Mandayu dayu pang irama lagu marhaban orang bahari. Taga sayang kada kasawatan aku balajar marhaban awan ayah ku bahari. Asa manyasal lai jua, sampai wahini nih kada bisa malagukan marhaban.

     Ayah ku bab maajar mangaji ni tagas jua, siap ada rotan di higa tangan nya. Tu yang mambari takutan. Maka balajar pang basungguh sungguh. Alhamdulillah, aku ni di kira pambisaan, lakas dapat napa nang di lajari, bilang kada suah ai kana rotan. Kada kaya paadingan ku nang lain, karap hajak tatangis kana rotan. Taga pang,nangis2 jua, baca tatap baca. Sampai kada karuan bacaan nang di sambat. Kaitu pang galagat balajar mangaji bahari.

Bagarit

41-BAGARIT.

     Bagarit ni ujar urang malayu berburu. Salalunya kami bagaritan ni sudah imbah habis banih di bandang. Lagi ramik amun di bandang tu ada banyu sikit sikit, ramik pang bukahan mangapongi burung. Parkakas nang wajib di bawa lastik, kayu pingkalungan awan pisau halui hagan manyambalih. Kami gin mulakan bajalan di bandang2 urang. Di mana ada padang tagah, di singgahi, di catuk catuk rimbunan tagah tu, kaluku ada burung bapatak. Amun talihat ia tarbang, di lihat pang kamana ia hinggap bapatak, carie sampai dapat. Amun kalihatan ia bapatak jauh di dalam, cuba cubaiai di lastik, nasib baik kana, pingsan pang burung tu, maka lakasi pang di sambalih. Amun ia tarbang kada sawat malastik, kayu pingkalung pulang di hawarkan, nasib baik kana. Amun kada kana, parhatikan kamana ia hinggap, kapong pang sampai dapat. Nang ramik bagarik ni arik hujan, burung kada hingkat tapi tarbang, nyaman saikit. Taga awak gin uyuh banar pang amun bukah dalam hujan. Taga ramik punya pasal, kada kisah samuaan tu. Amun banyak baulihi tu ramik pang, biasanya babagi bagi pang sakawanan. Kada kira ai sapa banyak bulihi, bagi pang sama sama patut, jangan ada bahiriaan, esok esok jadi rami bagarit lagi.

      Satu hari tu, malang bagi kami, kada bulihi barang saikung gin bagarit. Adalah surang kawan ku tu nang nakal sikit, di lastiknya itik ingunan urang, di sambalihnya 2 ikong. Siap sambalih tarus di kulayak kulit bulunyak, sampai togel, kapalanya di buang. Nah ujarnya, kita dapat balibis 2 ekong arinik. Mulai hari tu, hati aku dah mula tawar handak bagarit. Dah mula ada rasa takutan, kaluku kada bulihi burung, itik urang jadi mangsa. Itu nang aku kada handak.

Manyuntan niur

40-MANYUNTAN NIUR.

     Bahari duit ngalih nak dapat. Handak bagawik awak haloi lagik, urang kada pacaya handak mambagi gawian. Handak maintak ka kuitan, kuitan gin bukan tapi ada baduit. Duit hagan cukup balanja harian hajak. Ayah ku gin bagawi maambil upah hajak pang di mana mana, bagi manyara kahidupan saparanakan. Amon dah musim banih tu, hanyar tabanyak sadikit baduit. Taga duit lih, ada hajak parlo nya, macam macam handak di tukar, mana lagi handak di simpan sikit sikit hagan di waktu susah.

     Satu hari tu aku bajalan jalan di paranggan bandang urang, talihat banyak buah niur bahamburan sudah karingan kada di ambil. Tagarak hati ku handak maambil mambawa bulik, ku bawa ai bagamatan ka rumah labih kurang 20 bigi. Urang lain kadida nang tahuk. Ku kupek niur tu awan cop sampai siap, ku buat ka guni baja. Napa lagi andak kai ka ancak basikal, handak jual ka kadai. Ku cuba cuba manunggang basikal tu mambawa niur, asa kada hingkat, aur handak rabah hajak. Panyudahnya aku heret hajak basikal tu sampai kakadai, mujur kada jauh. Sampai hajak ka kadai, tokeh tu nang manurunkan guni baisi niur tuh. Di kiranya bujur ada 20 bigi. Tarus hajak di bagi nya duit rm4.00. umai asa ramik nya dapat duit rm4.00, asa banyak ai sudah.

     Bulik hajak karumah, umak ku sudah mahadangi bakacak pinggang lalu manakoni. ‘niur sapak ikam jual, ikam manyuntan kah’. Maka takotan nyak aku, asa galitiran awak, asa handak manangis sudah. Umak ku tarus bamamai, mamadahi aku sambil managis. Umai sadihnyak aku, manangis jua aku. Mujur jua umak kada mamukuli. Tapi aku sadih babanar, bartobat aku kada handak manyuntan lagi. Tu pang sampai wahini aku masih taingat nasihat umak ku. ‘kaya apa susahnyak kitak, jangan sasakali kita manyuntan andihurang’. Tobat aku sampai wahini, mimang kada wani maambil hak urang lain.

Basunat

Kaganangan-39.

     Aku basunat ni waktu umur ku 11 tahun, cuti hujung tahun, imbah papariksaan panilaian darjah 5.  Kakanak sakulah wahini papariksaan UPSR, sudah darjah 6. Aku basunat bahari di rumah hajak. Tok Mudim nang manyunat kan. Kada kaya kakanak wahini, kabanyakan nya doktor nang manyunat, wahini kadida lagi tadangar Tok Mudim nang jadi tukang sunat. Sabalum basunat di suruh nya duduk di atas batang pisang nang sudah di tatak handap. Di hadapan ku di andaki daun kaladi nang di parupuiyi awan habu dapur. Tapih nang ku pakai tu di singkap ka atas, manutup muha awan kapala. 

     Tok Mudim tu ada ai bapasan, amon wani handak malihat, buka hajak tapih tu ujar nya. Cehhh asa kada wani aku malihat, hijakan haja batutup muhak. Siapa nang kada takutan handak di sunat, malihat pisau Tok Mudim haja gin dah asa galitiran awak.  Taga nang kuatkan hajak samangat, musti bolih basunat... jangan takutan. Dah sampai masa basunat, aduiiiiiii..... sakitnya anu ku di kapit awan 2 bilah macam buluh, sakit banar..... sampai asa ta angkat2 burit manahan sakit. Tahan nakan juwa lah, imbah tu tarasa ai hujung anu ku tu di tatak, taga kada rasa sakit banar, sakit lagi nang di kapit nyak tuh. Kada lawas....... Dah salasai ujar Tok Mudim. Bagamatan nai aku malihat ka bawah, ndaran sudah babalut ubat awan batampal plasta. Kalihatan sikit2 darah di habu di daun kaladi tuh. Saminggu jua ai ma arit, hanyar waras. Saminggu jua ai kada mandi awan kada bolih turun ka halaman, kaluku talangkah tahik hayam ujar urang tuhak, kainak kaluku buruk, Tu pang pantang urang bahari.

Di kapong lambo

    Suwah sakali tu, bulik dari sakolah di kapong lambo. Umai takutannya akuk, mencicit bukah salajuk nyak sambil takuciak. Pamulaan tu kada hiran nai lambo nik, biasa hajak sudah malihat lambo makan rumput di pinggir jalan. Sahari tu akuk mambawa ranting kayu, sampai ka parak lambo tu, aku jolok hintaloknya nang tagantung tuh, napang lagik, sarik lukok lambo tuh, di tolehnya aku. Akuk pun jadik takutan, tarus aku bukah. Ko toleh ka balakang bunyi kadabus gadabus, rupak nyak lambo tu mangapong aku. Napang lagi akuk tarus takuciak mintak tolong awan bukah salajuk lajuk nya. Mujur lah lambo tu baranti mangapong. Amun di kapongnya tarus, kaya apakah akuk agak nyak, mau hajak pingsan atau mati di sondol lambo. Sajak kajadian hari tuh, kada wani lagi udah mausik lambo. Kalau bolih mailak, mailak pang akuk dari tahaga lambo. Dah jadi takutan.

Tulak bulik sakulah bajalan batis

Artikel-37.

     Taingat bahari aku sakolah, karap bajalan batis haja, baik tulak atau bulik. Masa pamulaan masuk darjah satu jua am baatar, ayah pang nang rajin maatar. ya ai kada wani lagi handak sakolah. Lawas kalawasan muyak udah lukuk ayah maatar, maambili. Mapa itu ai, ayah handak bagawik. Mula lah pagik hajak ayah maatar, bulik dah di suruh bajalan batis. Tapaksa ai, wani akan jualah handak bulik. Pamulaan tu ada ai rasa takutan, handak ulah kaya apak, kadadak sapa handak maambili. Napang lagik di ayun nai batis manyampaiyakan ka rumah, dua batu jauhnya. Lawas kalawasan kadak kisah lagik hudah bajalan batis. Pagi gin amun ayah kada hingkat maatar, bajalan nai lagi tulak sakolah.

Di Tampar Cikgu

35-DI TAMPAR CIKGU.

      Satu paristiwa nang kada kalumpanan hampai wahini. Masa tu hanyar darjah 5 sakulah randah. Aku awan kakawanan sakulah ni biasa hajak nakal lah lukuk sikit2. Satu hari tu, di waktu rihat, aku awan kawanan balima masuk ka dalam stor lawas di hujung sakulah. Lawangnya kada bakunci, jadi nyaman nai kami masuk. Napang ada ai di dalam nya, karatas2 buruk awan parkakas lawas2 nang sudah kada di gunakan. Jadi kami bafikiran dah kada baguna lagi lukuk barangan tu.  Aku kapingin nai malihat klip kartas nang sudah batagar tu, jadi ku cuntan nai sa ikit, adalah labih kurang 20 pin, kakawanan gin kaitu, maambil sikit2, ada yang maambil buku lawas, kartas kaban awan pensel. Kaluar hajak kami dari stor, tacagat sudah cikgu mahadangi. “Apa kau buat di sini, apa yang kau orang curi ni hah”..........kada sawat kami baucap apa apa,..... pang’...... pang’..... pang’, samuwaan kami kana tampar sakuat hati cikgu, sampai tapusing2, ada nak rabah, aku gin taduduk, kasakitan hampai kaluar banyu mata manangis. Mapa itu ai, mimang salah kami, Cuma rasa kurang puas hati awan tindakan malulu cikgu tu, tarus manampar, nang di cuntan gin bukan barang baharga lagik, sudah kada pakai lagik dah.

Bakasut Palastik

36-BAKASUT PLASTIK.

      Bahari hidup susah, kuitan salalu hidup bajimat jimat balanja. Manukar mana yang panting hajak, tantu nya agan makan dahulu. Jadi kaparluan nang lain tu ala kadar hajak. Kaparluan sakolah lagi lah kada di pantingngakan banar. Urang bahari tahu nya bagawi pang mancari duit, kada payah sakulah tinggi. Dari darjah satu sampai tingkatan tiga aku sakulah pagun nai bakasut palastik putih. Mapa ngitu ai, itu ha nang mampu di tukarkan kuitan. Sasudah masuk tingkatan ampat, hanyar hingkat bakasut kaya urang wahini. Itu pon sasudah aku bisa bagawi, mancari duit saurang. Pakulih bagawi manabas parit, aku manukar surang kasut hagan sakulah. Umai asa ungah banar pang wayah tu, bakasut harat. Amun di fikir fikir bagus jua bakasut plastik ni, nyaman mambasuh nya, papagian gin sawat, gusuk hajak labih kurang, imbah tu di lap karing2, sadia ai lagi di pakai. Cuma bau nya hajak nang kada sadap, amun sudah sapagian bakasut tu sakulah, bulik sakulah bukak kasut tu, babau harok pang. Lagi satu bakasut plastik ni musti basatokin, kalau tidak malicit pang batis, jadi kuringan.

Bawa Sango ka Sakolah

34-BAWA SANGO KA SAKOLAH.

       Masa aku sakulah randah, mimang jarang banar di bagi duit balanja. Karap mambawa sanguk pang ka sakulah. Basanguk nasi awan lauknya sakali, di bungkus awan daun pisang. Rami pang makan awan kakawanan di balakang sakulah, kada payah tulak ka kantin. Susubuhan lagi umak sudah bangun bamasak agan sanguk sakulah pagi tuh. Amun kada sawatan bamasak hanyar di bagi duit balanja, dua kupang sahari. Bahari dua kupang tu cukup hajak, nasi lamak sabungkus hanyar sa kupang, banyu nya gin sa kupang sa galas. Amun kuih2 ni lima sen jua sa buting, sakupang dapat dua, kanyang ngai makan. Kakanak wahini adalah lagi nang mambawa sanguk ka sakulah?. Kadidak lagi dah, supan ujar nyak. Blanja sakulah kakanak wahini paling kurang gin dua ringgit sahari.

Tabahirak bulik Sakolah

      Satu paristiwa nang kada kalumpanan lagi. Satu hari tu imbah hajak waktu rihat, parut ku sakit mamulas mulas. Tuhuk manahan sakit. Tahu ai asa handak bahira, tapi kada wani bapadah ka cikgu. Jadi di tahan hajak, asa handak tajujul jujul hudah lubang burit manahan tahi jangan takaluar. Balajar gin hudah kada salisa, duduk gin kada karuan, aur manahan tahi. Kanapa lih bongol banar bahari, handak bahira gin kada wani bapadah ka cikgu. Hampai lah babunyi locing bulik. Bagamatan nai basisimpun, bangun bajalan kaluar sakulah. Tuhuk mangapit burit sambil bajalan ka muto ayah mahadangi. Kada sawat sampai ka muto... takaluar sudah tahinya. Mapa ngitu ai, tahi mana hingkat di tahan lawas2. “ bau harok nih....ikam tabahira kah” ujar ayah manakuni. Umai kamaluan banar aku, kada wani jua baucap awan ayah, hampai lah karumah malukupi tahi di dalam saluar. Baik juga kada tabahira di dalam klas....... kalu tidak lagi supan.  

Mula Sekolah

Artikel-32

     Pamulaan sakulah bahari, asa asing banar, takutan banar. Imbah hajak di antar sampai ka lawang sakulah, kuitan(ayah) kada hingkat bulik. Tapaksa pang mahadangi di luar bilik darjah. Mapa ngitu aiii, amun kada talihat hajak ayah ku, maraung pang aku manangis. Tuhuk cikgu mamujuki, kada mau baranai aku manangis amun kada talihat ayah. Napa lih panakutan banar. Sudah 2 minggu sakulah hanyar asa wani sa ikit, kada payah di hadangi lagi. Tapi amun dah bunyi locing bulik, ayah musti ada, kalu tidak baribisan pang banyu mata. Bahari sakulah tarus masuk darjah satu, kadida Tadika kaya wahini, tu pang lukuk jadi panakutan masuk sakulah. Dah kalawasan sakulah hanyar makin rami, kakawanan gin ada hudah, kada lagi jadi panakutan. 

Kadida bajalan TAR

31:- 

     Kabanyakan jalan kampung bahari mana ada jalan Tar kaya wahini. Jalan tanah mirah gin di jalan utama arah ka pakan banarai. Jalan dalam kampung2 ni, jalan tanah biasa tu pang. Amun ari imbah hujan, umai loloknya jalan, kada hingkat babasikal atau bamuto. Hibak pang taya nyak awan tanah bagumpal gumpal. Bajalan batis gin uyuh pang, amun ba capal, satumat jua putus pang capal di talan licak. Handak bajalan jangan mamakai kasut atau capal, ba batis hayam hajak. Hanyar hingkat bajalan. Tu pang amon ari hujan hajak, karap pang kada sakulah, ayah kada hakon ma atar, bajalan batis, lagi nya ai kulir. Taga ayah gin kada kisah amun kada sakulah, kada suah sarik ayah. Bolih hajak manulung napak apak nang di ulah ayah umak di rumah. Tu pang aku ni kira parajinan jua di rumah, napa hajak di suruh kuitan, lakas hajak pang aku manuruti. 

Lampu Gaslin

30-LAMPU GASLIN.

      Di rumah ayah ku bahari ada lampu gaslin. Tarang pang amun makai lampu gaslin ni. Ia makai minyak gas hajak. Handak malikit jua mau ada minyak spirit. Mahangatakan batang awan mentol nya dahulu. Bila dah hangat hanyak di kujak pam nya, manaikkan minyak. Bila dah cukup hangat, cukup pam, banyala mintolnya, tarang pang. Aku hiran jua masa tu, kaya apa mintulnya di ulah dari macam banang basulam karandut, di bakar jadi habu, bulih pulang banyala tarang. Hiran mimang hiran. Mentol habu bolih banyala katatarangan. Lampu gaslin ni pakai banar pang, labih2 lagi amun ada urang baaruhan ganal, aruh bakawinan kah misalnya. Mainjam pang di rumah kakawanan nang ada. Mariah awan ramik nya bahari.

Kadida Api Letrik

     Sadangkan banyu paip gin kadida, apa lagi letrik jauh sakali. Bahari malam2 makai lampu palita minyak gas pang. Sabigi rumah mau ada sakurang kurang 5 bigi lampu tuh. Amun dah guring pasang lampu samprong. Sama ai jua lampu palita, Cuma lampu tu ada bakaca di kaliling sumbu api nya. Jadi amun kana angin, ngalih saikit handak pajah. Lampu palita ni marbahaya, amun rabah di langgar kucing, tumpah minyak nya, mudah banar tabakar rumah. Tu pang kana waspada pang salalu. Amun handak ngalih rabah, ulah hakan pang panyangkut atau pambaratnya. Di sababkan kadida letrik, tantu ai kadida parkakas letrik di rumah. Bamasak, manjarang banyu gunakan dapur kayu. Batatapas, hayun hajak pakai tangan. Ngukur niur awan kukuran atau parudan. Malubi baju ada starika harang. Amun humap awak, kipas cap tangan hajak, atau bagana di barumahan. 

Kadida babanyu Paip

Artikel 28.

KADIDA BABANYU PAIP.

     Bahari balum ada banyu paip ka rumah rumah. Banyu hagan nginum, manadah hajak hujan di dalam guri ganal. Tiap2 rumah musti ada manyimpan guri ganal, hagan manyimpan banyu nginum. Mandi bacabur hajak ka talaga atau di parit ganal di pinggir jalan. Batatapas gin banyu talaga hajak, kada ngalih di bandang banyak hajak banyu. Babasuh piring,kuantan gin samuwaan banyu talaga, di angkut pang ka rumah awan timba. Amon ari lawas kada hujan, banyu hagan minum habis, tu pang tapaksa  ma ambil babasikal atau bamutu, pakai tong 5 gilin, jauh di muara jalan ganal. Ada paip karajaan sadia akan. Tiap tiap parit kampung ada di sadiakan suting. Bagilir pang ma ambil, angkut bawa bulik. Amun kadida banyu paip tu kayapa lih....... tapaksa pang nginum banyu sumur atau talaga. Urang bahari, kada apa2 ai, biasa hajak hudah kahidupan kaitu.