Main pondok pondokan

     Kaganangan bahari rami nya ai main bapundukan. Sampai baharian kada bulik ka rumah, balukup di pundukan pang, siap bamasak masakan lagi. Main pundukan di kira ganal dah sikit awak, ya lah sudah bisa baulah pundukan surang, tihang awan parkakas nya kana cari dulu batang2 kayu nang sadang halui. Hagan hatap nya, hagan tawing, samuwaan kana cari. Amun rajin manyambit pang surang hatap daun nipah, harat sikit ulahan nyak. Amun kadida daun nipah, kada kisah hai hatapnya, daun niur banyak hajak atau daun halalang gin jadi. Asal bahatap awan batawing labih kurang jadiam. Amun handak bamasakan, kana mambawa pang saikit baras awan lain2nyak dari rumah, mainjam kuantan haloi awan rinjing umak. Nang sanang lauk nya manukar hajak ikan sardin. Atau marandang hintalu hayam. Amun baulihi ikan lagi ramik, siap babanam pang ikan tuh. Huiii saja ramik bapundukan awan kawanan atau paadingan.

Mandangar Halikoptar lalu

    Kanapak leh zaman kakanak bahari, amun mandangar hajak helikopter kah atau kapal tarbang kah tarbang randah, kalam kabut pang kaluar dari rumah handak malihat. Umaii ramik nyak malihat, Amun ari hangat atau silau siap andak tangan ka dahi, nyaman hawas malihat helikopter tarbang randah, kalihatan pang kipasnya bapusing cinit. Waktu tu hajalah ada paluang malihat helikopter, kaitu rupanya nya leh, kaya apa ia hingkat tarbang, kaya apa ia handak turun, brapa urang di dalam nyak, kada takutan kah urang nang naik helikopter tu. macam2 mai tatakunan di dalam hati nang kada tajawap. Handak malihat nang sabujur nya parak2 di mana leh, apa lagi handak manaik ki. Amun handak tahu, sampai ka tuhak wahini gin, sudah bacucu, kada suwah aku naik helikopter handak tulak ka mana mana. Mapa ngitu ai kadida paluang kaya apak.

Malihat Kapal Kuruk

        Satu kanangan yang kada di lupakan. Malihat kapal kuruk manyangkul parit. Tahan baharian pang maitihi ia bagawi. Masa bahari boleh di kata saban tahun ada kapal kuruk lalu mandalami parit. Parit ni agan mambanyui bandang. Kapal kuruk bahari ganal, ada baguguar panjang, batali wasi, di hujung tali wasi tu ada tangguk wasi jua, siap ada gigi 4 batang lagi. Masa ia bagawi, tangguknya tu pang nang di hawarkan ka parit, manyankul bulanak awan tanah, di tarik, imbah tu di lungguk2, di rataakan di atas jalan. Kapal kuruk ni ada saliparnya, kayu ganal 4 sagi lebar awan panjangnya. Bila handak ba alih ka hadap, di alihnya pang sabuting dami sabuting papan saliparnya. Amon kada basalipar luku tapajal pulang kina kapal kuruknya. Malihat kaitu asa canggih (harat) banar pang hudah bahari, hiran awan rami aku malihat. Biasanya ia bahanti bagawi pukul 5 patang. Bila dah bulik dribal nya, banyak pang kakawanan manaiki awak kapal kuruk. Bukan hingkat ulap apak, rami kakayak itu pang bamain di atasnya..... kakanak ya am lagi.

Main Rakit Batang Pisang

24-MAIN RAKIT BATANG PISANG.

          Satu lagi pamainan kakanak bahari. Baulah rakit dari batang pisang. Tabang haja babarapa batang pisang labih kurang panjang sadapa labih. Sabaiknya mau 4 atau 5 batang. Di cucuk awan kayu di hadap awan di balakangnya, atau di ikat ikat haja, di gampirkan manjadi macam rakit. Batang pisang timbul di banyu, timbul2 tahi ujar urang bahari. Sabuting rakit tu kada hingkat naik banyak2, paling2 dua orang saja, labih pada tu tanggalam pang. Bila dah naik rakit tu, ramai pang kasana ka sini bakayuh awan papan sumbing. Lagi banyak baulah rakit, lagi ramik, boleh balumbaan siapa nang laju kayuhan rakitnya. Amon tahu kuitan atau orang tuhak, tuhuk pang di mamaie nya, habis batang pisang nang kada babuah lagi di tabang. Siapa nang kada sarik, kuitan tuhuk mananam pisang cagar mamakan atau manjal buahnya, nik balum babuah, batangnya dah habis di tabangi kakananakan. Dagil2 jua lih, tapi rami punya pasal, kada kisah di sariki. Sarik2 kuitan bukan apa.......tatap sayang pada anak2 nyak.

Bisa Bakunyung

        Olih karana hampir tiap hari baudak di parit toh, lama kalamaan akhirnya aku gin bisa bakunyung.  Awak gin dah makin ganal, tapi kasa supan supan batalanjangan nai lagi. Amon naik ka atas titi, tukopi pang palir awan tangan. Gadabau batajun kadalam parit. Macam2 pisin tajunan, nang ramiknya tajun tiruk pang. Tajun kapala dahulu, mancirup pang tajunan. Taga tajun tiruk ni hidung musti di picik pang, kalau tidak  mau lamas, banyu masuk ka dalam hidung. Lagi satu mau bisa mangawal awak, jangan sampai ta tiruk balanak. Di lakasi pang bingkukkan awak ka atas, supaya timbul ka atas banyu. Soal bakunyung ni lagilah macam2 pisin nai jua. Nang rami nyak bakunyung banyalam. Di sini banyalam, bakunyung di bawah banyu, nun di sana tu timbulnya. Lagi panjang tahan hinak, lagi jauh hingkat bakunyung. Kadang2 tu main balumbaan pang, siapa nang paling jauh hingkat bakunyung banyalam. Atau pun nang paling ramik main lilingitan. Sapa nang jadi ia pang nang sasamaan bakunyung sampai dapat mancuil. Kada kisah pun bakunyung kaya apa cara sakilpon. Mimang panat, tapi ramik. Tuu lah kakanak bahari nang bagana di bandang, bolih di kata samuannya bisa bakunyung. 

Tajun ka parit, kalamasan.

        Kisah ngini masa aku haloi lagik, masa tu umur hanyar 7 tahun luku, kada tapi ingat dah. Taga nang tantunya aku ingat aku malihat kakawanan ku nang sudah ganal2 rami banar mandi baudak di parit di higa jalan tu. Paritnya ganal, dah tu dalam pulang, amon orang tuhak gin lacup pang hidung hanyar tajajak balanaknya. Kakawanan ganal tu samuwaan sudah bisa bakunyung, kada parlu di takutanakan lagi. Yang aku ni asa garigitan malihat dipa karamian bakunyung kasana kasinik. Yang aku asik di higa parit intang nang kada dalam hajak. Entah macammana, aku gin kada ingat, tatahu nya aku naik ka atas titian toh, tarus jua umpat batajun ke dalam parit, kana pulang di tampat yang dalam. Napang lagi tanggalam timbul pang aku, takial kial, tuhuk handak bakunyung, taga kada bisa lagi. Mujur jua ada nang tahuk, aku nang tanggalam timbul tuh. Di lakasi nya pang mambair awak ku  kahiga parit. Umai........ terbabalahak aku muntah banyu, kada tahoam dah barapa banyak banyu parit nang aku nginum. Tarus aku di mamaie dipa. Ya am to, kada bisa bakunyung lagi handak umpat batajunan di tampat nang dalam. Mujur jua kada mati kalamasan.

Main kapal layar sabut nyiur

       Main kapal layar ni bolih di kira canggih juwa di zaman bahari tu. Ya lah, pikiran parlu bijak(keriatif), kaya apa handak maulah kapal layar. Bukan nya kapal layar ganal nang hingkat di naiki, hagan main lumbaan banarai, kapal siapa nang paling laju di tiup angin. Kapal layar ni di ulah dari sabut ngiur banarai. Sabut niur kan timbul di atas banyu, kada mau tanggalam. Cara maulah nya, cari sabuting sabut nang sudah bakupik niur nyak, di tarah2 lah sikit2 di baiki rupanya. Imbah tu cari bilah buluh, plastik nipis, banang atau tali rapia hagan maikat. Cacak bilah buluh di tangah2 bahagian dalam sabut tadi, di ikat bapalang buluh lain lagi, imbah tu pasang/ikat tai plastik nipis tadi. Handak bisa pang maikat, jangan sampai tapacol, hampai harat panglihatan nya. Nah sudah siap, cari sa ikit zink, labih kurang 2 in, di tatak 3 sagi, cucuk di bawah balakang sabut tu agan kamudi kapal. Nah sudah siap. Main kapal ni salalu nya di musim bandang babanyu, bandang sudah barasih, lingai kadida barumput, malaut hak pandangan nya. Bila ada angin mula lah bantanding, kapal siapa nang paling laju di tiup angin, amun kada harat ulahan, tatunggang tungging pang di tiup angin, nang baik ulahan nya.......huiiiiihhhhh maluncur laju....jadi pamanang. Arai banar pang.

Main kuda kalaras pisang

       Bahari umak ayah ku banyak batanam pisang, di pinggir2 batas. paling banyak pisang awak. Pisang nang nyaman di ulah kuih. Pisang awak ni hidupnya subur, capat baranak pinak, ngalih handak mati. Amun sudah subur, anak nyak hidup rapat2 awan ganal2. sampai kada sawat tasiangi ulih kuitan, tagah pang awan kakaras pisang. Bagi kami kakanakan ni, tu yang rami, amun pisang tu kada babuang lagi kalaras nyak, ada can lah handak maulah kukudaan hagan tunggangan. Cari hajak pisang nak baparakan 2 pokok, lalu di sambung sambung awan kakaras2 pisang nang banyak tuh. Sambung hampai bujur2 kuat awan tagap. Maulah tu di ganali saikit, kararas pisang banyak hajak, kada cukup nang di pukuk tu, cari di pukuk nang lain, ikattakan hajak banyak2, sampai hingkat di tunggangi. Nah siap hudah kuda kalaras pisang, panjat tai lagi, tunggang, di ayun ka hadap, ka balakang, umai ramik nyak.... asa asa naik kuda bujur rai.

Main hayam bahintaluk awan Warik

       Ni pamainan nang paling ramik. Parkakas main nya tali lambu awan salungguk sabut niur. Amon 10 urang main, sa urang jadi hayam, 9 urang lagi jadi warik nyak. Sapa nang di undi jadi hayam, awak nyak kana ikat awan tali lambu sapanjang labih kurang 3 dapa ka kayu nang di cacak di tangah lunggukan sabut. Hayam kana balukup maharami hintalu nyak. Nang lain jadi warik nyak badiri bakaliling. Pamulaan main hayam gin babunyi, kutak ku takuk, kutak ku takuk. Napang lagi si warik2 gin barusahak manyuntan hintalo hayam tu (sabut) sabarapa banyak nang dapat. Dalam pada tu, si hayam masti dapat manangkap salah sa ikung warik tu. Amun dapat manangkap, ia pang pulang jadi hayam. Amun warik tu kada dapat manyuntan sabut tu, warik tu pulang jadi hayam. Tu yang kadida siapa hakon jadi hayam. Jadi warik2 barusaha banar pang mandapati sabut tuh, kada kira aii sabigi dua jadiam. Mimang ngalih handak manyuntan, di lukupi hayam tu kaya apa, silap2 kana tangkap, takana gawil (cuil) hajak gin dah kira jadi hayam pang. Mapa ngitu aii, dah adat pamainan. Tapi amun sampai habis sabut tu kana cuntan, warik pulang samuwaan dapat, kada kira sabigi kah 2 kah. Maka tapaksa pang hayam tu tarus jadi hayam. Hayam gin bakutak lagi, kutak ku takuk........ samuwaan sabut2 tu di pulangkan ka hayam. Bamula pamainan kali kadua. Salagi kadida warik nang kana gawil/tangkap, salagi tu lah hayam tarus jadi hayam, sampai linjan pang. Amun kada tahan sampai tatangis pang hayam, aur kana cuntan hak hintaluk nyak. Tapi amun hayam dapat manggawil salah sa ekung warik tu... haa siap lah warik jadi hayam pulang. Tapi warik2 tu pintar2, bila nang di hadap ma acah2 nak menyuntan, warik nang di balakang dapat, sampai habis licin.... kaya apa hayam kada manangis..... kasian2..tapi ramik.

Main hawar botol awan bola gatah

      Pamainan ni gin biasanya 2 kumpulan, kalau ba anam, babagi surang tiga urang satu kumpulan. Parkakas pamainan sabigi bola gatah, awan sabigi botol kicap. Sasudah wan to som, kumpulan mana mahawar butul dahulu. Mulai mahawar surang dami surang, amun kadida sapa yang kana, kumpulan ka 2 pulang mahawar. Sampai ada nang kana marabahkan butul. Bila kumpulan tu dah kana mahawar, kumpulan tu bapatak satumat, manyungkup kan bola dalam baju. Bila kaluar ka tiga tiga babuat tangan ka dalam baju, bapiragah mambawa bola. Padahal surang hajak nang ada bola. Nang dua tu piragahan banarai. Kumpulan nang mambawa bula tu, bakumpul manjaga butul tadi. Hah... napa lagi kumpulan nang suting berusaha manyuntan butul tu, tapi awas jangan sampai kana hawar awan bula. Masaalah nang rami nyak...... kada tahu sapa nang mambawa bula. Kadang2 nang kadida bola ma acah2 handak mahawar, siapa nang wanik mamaraki. Tapi amun asa yakin ia kadida mambawa bula, kita bulih tangkap urang tu, markahnyak sama hajak awan dapat manyuntan butul. Tapi masti dapat manangkap urangnyak atau ma ambil butul sabalum kana hawar awan bula. Tu nang ngalih nyak, kada tahu sapa nang mambawa bola. Ka tiga2 nyak bisa baparagahan mambawa bola. Si pambawa bola amun kada kana manuju salah surang kumpulan panyuntan tu, kumpulan panyuntan tu pulang mamulai mahawar botol, giliran depa pulang manyuruk bola dalam baju. Kaitu pang pamainan nyak urang bahari.

Main Tembakan

      Main tembakan ni kira harat(canggih) pang wayah bahari. Sanapang kana ulah dahulu. Kakanakan halui kada bisa maulah. Kakanakan nang ganal pang bisa maulah. Takadang tu nang kuitan maulahakan agan pamainan anak nyak. Sanapang ni di ulah dari papan buruk (papan nang sudah kada pakai), di tarah, di bantuk sarupa sanapang bujur, labih kurang lah. Larasnyak di ulah dari buluh nang sadang ganalnyak. Buluh tu di lubangi mamanjang, sapanjang ruas buluh, tinggak saikit kada batabuk di kadua hujung. Hujung nang pangkal di ganali saikit tabukan nya, agan mangait (manyangkut) palaras panimbak. Hujung nang suting di ikat gatah nang sudah ada palaras panimbaknya. Bila handak manggunakan, di inat (di tarik) gatah tu ka pangkal buluh, kait kan ka lubang nang saikit ganal tu. Isi ie paluru, salalu nyak paluru dari batang bamban di tatak handap2. nah siap pang sudah hagan batimbakan. Handak manimbak, picik haja painat palaras tu, mandasup pang kaluar paluru dari hujung. Tapi amun mambawa bukah sanapang ni, kana tungging kan ka atas, kalu tidak gugur surang palurunya. Amun kana timbak gin bukanya sakit banar, sakit sikit2 biasa hajak Pamainan ni biasanya 2 kumpulan, amun 10 urang, babagi surang 5 urang. Nah ...bamula ai lagi baparang, batimbakan ilah kombet antara 2 kumpulan, masing2 pang bapatak handak manyarang handap. Siapa nang takana timbakan, di kira mati, kada bulih main lagi. Sampai habis kana timbak satu2 kumpulan tu, di kira kalah. Kumpulan nang kada habis kana timbak di kira manang, walau pun hanya tinggal saurang. Ia lah hero nya.

Main Guli

MAIN GULI.

      Satu lagi pamainan urang bahari ialah main guli. Ada dua janis, satu main guli biasa, suting lagi main guli pitik. Guli biasa tu nang halui2, di ulah dari kaca, babunga di dalam nyak. Main nya gin sanang hajak, contohnya amun main badua, bayar dulu surang 5 biji, jadi 10 biji lah. Imbah tu di timbai serakan ka hadapan, malapasi garisan. Amun kada lapas timbai lagi. Imbah tu kawan nang kada manuju tu, tunjuk, guli mana nang handak di tuju, salalunya tantu lah guni nang ngalih di tuju. Si panuju gin hawarkan guli panuju, di sambat tagan ka guli nang di tunjuk tadi, amon kana, ia pang ampun nyak samua’an. Amun kada kana, bagantian manimbai awan manuju. Tapi amun kana gin ..... takana guli lain, di kira kada aci, bolih di danda awan manambahi guli, lagi banyak lagi ramik pang amun kana tapat. Bah amun manang hibak pang pakit awan guli, sampai bajalan gin singit, kabaratan mambawa guli.  Suting lagi main guli pitik, guli ni di ulah dari batu, bulat, licin taganal saikit. Cara main nya, bakumpulan. Balawan mamasuk kan guli tu ka dalam lubang. Kita bolih manjantik guli lawan, sampai tajauh dari lubang, asal parak haja, di jantik, takadang tu sampai pacah pang guli lawan, hampai kada hingkat main. Kaitu pang pamainan nyak, sapa yang manguasai lubang ia pang di kira pamanang nya. Rami mimang rami kakanakan bahari, sampai bahaharian main guli, hampai di sariki kuitan, mapa ngitu ai.

Main Gatah Galang

      Kakanakan bahari pamainan nya nang mudah2 haja. Contohnya main gatah. Gatang galang bahari banyak bajual, murah haja, nukar sakupang gin banyak. Wahini kadida lagi talihat kakanakan main gatah. Macam2 cara ada pamainan nyak. Nang popular bahari main tembak gatah. Main tembak gatah ni rami amun bakakawanan, kada kira ai, 2 ka,3 ka, 4 urang kah, bulih haja main. Caranya pamulaan kana sadiakan tapak pamainan. Di situ ada 2 batang kayu halui, di cacak ka tanah, labih kurang satinggi 6 ini haja agan manggantung gatah2. Imbah tu  sasiapa nang handak main, kana bayar lah dulu awan gatah, contohnya 10 gatah surang, amon 5 urang dah jadi 50 gatah. Gantung samua’an gatah tu, imbah tu timbak pang bagilir gilir, osom dahulu siapa nang manimbak dahulu. Panimbaknyak gin di ulah dari gatah jua, di pintal, di ikat ganal2 di sambat padok. Jauh nya manimbak labih kurang 2 dapa. Sasiapa nang manimbak gugur gatah2, ia pang ampun nyak. Amun gugur saparuh, saparuh lagi di tembak urang badudi.  Bila dah habis hanyar ulang lagi samula., bayar mangikut nak di hakoni. Tu pang rami nya, amun urang nang pamulaan manimbak kada kana, nang lain basurak pang, nang kadua pulang manimbak, gin kada kana, lagi riuh suraknya, sampai ada yang bisa manuju manggugurakan sampai habis. Hanyar talopong nang lain. Amun manang main hibak pang galang gatah dari tapak tangan sampai ka siku. Tu yang arai nya kakanakan dahulu. Nang kalah tu biasalah, basadih, ada yang sampai manangis......

Main Bapatakan

      Kakanakan bahari amun takumpulan, macam2 pamainan nang bisa di main nyak. Paling2 bongol gin main bapatakan. Salalunya labih kurang 5 atau 6 orang. Handak manantukan siapa tukang cari, ‘osom’ dahulu, siapa nang kalah, inyak pang nang batukup mata dahulu, bakira no 1 sampai 20. Nang lain tu bukahan pang mancari tampat bapatak. Dah cukup kiraan 20, malilau pang mancarie kawanan nang bapatakan. Tapi kana barhati hati banar pang, kaluku kana ‘SIP’. Amon kana sip, tapaksa pang jadi tukang cari lagi sampai linjan. Bila dah tajumpa musti sambat ngaran sabujur nyak, amun kada bujur, jadi pang sakali lagi. Cari lagi sampai habis, dalam pada tu masti barhati2, kaluku mancangul dari balakang, jangan sampai kana sip, sabalum manyambat ngaran nyak. Uyuh pang di karjakan kakawanan, takadang tu sampai tatangis, kalinjanan.... kadida paluang handak bapatak, asik jadi tukang carie hajak. Mape itu ai... dah kaito cara pamainan nyak.

Main Tanah Liat

MAIN BAU-ULAH DARI TANAH LIAT.

     Kasukaan ku masa haloi main tanah, di tampa tampa di ulah macam2 bantok. Tanah liat di bandang nang kanyal2 lagi basah tu hingkat di ulah macam2 bantuk banda. Baulah bantuk karita, bantuk kuih2, bantuk hayam, macam2 mai lagi, kada kasambatan. Dah siap maulah tu, di jamor pang sampai karing, hanyar baik rupa ulahannya. Amon kakanakan wahini ada bajual plastisen (tanah liat gatah), bahari mana ada, tu pang tanah liat bandang nang di tampa. Kajadian karap main tanah, kuringan batis awan tangan, ya aii, tanah tu bukan nya barsih, banyak kuman, urang bahari mana tahuk. Nang tahu nyak rami pang. Kakanak wahini rasa nyak kadida nang tahu lagi dah main kaitu.

Manyimpan Banih

      Salalu-nyak urang bahari nik nyaman manyimpan banih di barumahan. Kada kahujanan. Biasanya susun hajak baguni guni di barumahan. Andaki kayu ganal huluk di bawah guni tu, kayina kaluku basah amun hari hujan, banyu ada yang malayau ka barumahan, lecak pang. Banih amun di hija akan di dalam guni basah, mau tumbuh, batunas mamutih. Tajuluran mamutih di kulit guni. Kada sadap lagi di kilang di ulah baras. Amun handak manyimpan banih pastikan karing pang batul2. Jamur dahulu di atas tikar, di halaman nang kana hangat matahari. Tapi amun ari handak hujan, kalam kabut pang manyimpuni, mambuati ka dalam guni. Amun kada sawat, lingkup haja tikar tu, tarik lakasi kabarumahan. Atau tutupi awan tikas plastik. Amun nang tasugih sikit tu siap ada gudang hagan manyimpan banih. Simpanan agan pamakanan agan satahun. Urang bahari kada suwah manukar baras. Amun kahabisan baras, antar pang banih sa-guni ka kilang halui. Banyak hajak kilang maulah baras. Wahini kadada lagi dah kilang halui2 ni. 

Rumah batihang tinggi

     Kabanyakan urang bahari maulah rumah tinggi2 barumahan nyak. Hingkat bagana di bawahnya, urang tuhak gin kadak tahangkup dahi ka rasuk awan galagar lantai. Amun kakanakan lagi nya aii, rami banar main di barumahan, dingin, kada humap. Angin sanantiasa hajak batiup. Amun ada kasur di barumahan, lagi nyaman guring siang. Kada katahuan hayam datang mahirai. Tangga nya pun tantuai tinggi, sampai 5 atau 6 tingkat. Uyuh pang batis amun karap turun naik. Guring malam tantu nya di rumah atas, nyaman dingin, bakalambu gin kada humap. Amun handak bakamih malam2, kada payan turun, tulak haja ka tampat pambasuhan parak dapur, ada lubang di situ, nah pancutakan hajak ka pacirin di bawah nya.

Umak ku gin parajinan

     Umak ku ni mimang parajinan urang nyak. Kamanak hajak amun ayah mambawa bagawik, umpat pang umat kuk, di bawaknya pang anak anak nyak yang hanyar dua urang ni. Amun tinggal di rumah gin, umak kada baranai hajak. Adak haja nang di ulah umak ku. Umak ku rajin batanaman. Macam macam di tanamnyak. Hubik kayu, kalidik, jagung, kacang, pisang, kaladi, macam macam lah. Umak ayah kadak suwah manukar sayur, hari hari makan sayur kampung hajak. Hubik kayu pun bulih di gangannya di ulah lauk. Sayuran lain macam macam ada di bandang ni, kangkung, pucuk hubi, maranti, susupan, silum, tongkol pisang, pisang anum, labu, pucuk labu, nangka anum, rabung, macam macam mai lagik, kada kakurangan sayuran kampung nik. Umak ku nik bisa juwa maanyam tikar dari bingkuang atau purun. Banyak batikar di rumah, amun ada yang handak manukar umak jual lah. Umak gin bisak baulah bakul dari bamban. Banyak bakul di rumah umak, dari yang haloi sampai ka nang ganal. Amun bakul tu handak di bingkai, salalu nyak ayah pang nang mambingkai yakan awan rotan walatung, amun ada urang handak umak jual lah. Banyak hajak sumbar pancarian ayah awan umak ku nak rajinan nik. Paribahasa orang bahari, ‘kadak bagawik kadak baduit’. Amun rajinan, samuan bulih jadi duit.

BABANDANG

     Kaluarga ayah kuk nik gawian utama nyak batanam banih. Masa akuk haloi, balum tahuk apa apa lagik, amun ayah awan umak ku ka bandang, batanam banih akuk awan abang ku di bawaknya pang samak ka bandang. Ada pondok halui agan kami barihat di tangah bandang. Pondok nik bolih di angkat angkat, di pindahhakan, kamanak ayah umak bagawik, kasitu lah pondok ni di arak. Kada wani ayah umak maninggalakan kami di rumah, di bawak nyak pang umpat ke bandang. Kada suwah juga di suruh orang lain ka maingun kami. Kamanak haja amun ayah awan umak tulak bagawik, di bawak nyak pang kamik badua baading nik. Lain lah amon ayah hajak yang tulak kamanak manak, kami tinggal la di rumah awan umak. Ayah ku nik rajin banar bagawik, salain babandang surang, rajin jua maambil upah di bandang urang. Kadak kirak napak hajak gawian kampung, samuwaan bisa di ulah nya. Salain babandang bisa juwa maambil upah manabas, manyangkul parit, batanaman sayuran, hubik, jagung. Salain tuk bisak jua manukang, maulahakan rumah urang. Macam macam lah gawian nyak, kada tasambatan samuaan nya.

Ading ku meninggal dunia.

     Kada lawas imbah pindahan, umak ku baranak pulang anak bibinik. Ba ading pang aku sudah. Taga kada lawas, sa puloh hari juwa ai imbah di baranakakan, ading ku tu maninggal dunia, sadih hai banar umak awan ayah, mapa itu ai, sudah kahandak Tuhan, kita kada hingkat maulah apak. Nang aku ingat wayah tu, banyak urang datangan, masa tu musim bandang babanyu, samuwaan manyinsing tapih atawa salawar handak datang ka rumah ayah.  Aku ni kada tahu napa apa lagik, kada tahu manganal kasadihan lagi, tahu nyak ramik pang. Halui ya am lagik.

PINDAH KA PARIT 11

      Sudah siap ayah baulah rumah, hanyar kami di bawa pindahan. Masa tu aku hanyar badua baading, ading2 ku balum lahir. Bagana lah kami 4 baranak di rumah hanyar, rami aii, wayah tu kakanakan banar lagi, napa apang tahu nyak. Masa tu jalan dari jalan ganal ka tambak rumah balum di ulah. Iya aii, musim bandang babanyu, kada hingkat maulah jalan, hadangi pang sampai musim manuai kinak. Umak awan ayah nyaman hajak bajalan di banyu tu, singsing hajak tapih, kada basahan. Aku nik di kilik pang ulih umak ku. Abang ku to, wanik sudah maradah banyu, rami pang abang ku main banyu.

BAULAH RUMAH HANYAR

BAULAH RUMAH HANYAR.

      Dah ada tambak, hanyar hingkat baulah rumah. Sarba sadikit ayah mula manukar kayu cagar baulah rumah. Rumah pamulaan, kada jua ganal, labih kurang 20 kaki x 30 kaki. Saamuwaan kayu tukaran, kira harat lah sikit. Bilik nya sabuting jua, tu gin kada balawang. Hatap nyak zink. Tawing nyak papan. Tapi intang dapur, hatap awan tawing nyak magunai nipah. Kada mampu lagi maharati samuwaan. Tingkap nyak nang sadih, guni haja di gantung, amun siang di gulung ka atas, malam hanyar di turun nakan. tu pun batahun tahun lawas nyak. Baik jua kadida bamaling, kalu tidak nyaman banar pang maling mamasuki.

MANAMBAK TANAH AGAN TAPAK BAULAH RUMAH

MANAMBAK TANAH CAGAR BAULAH RUMAH.

      Tanah bandang tahuk haja lah, randah, di bawah paras banyu. Amun handak baulah rumah, tapaksa pang manambak, di tinggi akan dahulu. Pagi patang, bahaharian pang ayah manyangkul baulah tambak. Sampai jadi kolam ganal awan dalam nyak di kiri kanan tambakan toh. Kolam to baguna banar ai jua, hagan pamandian awan batatapasan. Baguna banar banyu nyak. Salain toh, hingkat juga di ulah kolam ikan. Amun bandang sudah di karing ngakan, balungguk pang ikan babuat ka kolam toh. Rami pang kayina manangkapi ikan nyak.

MANUKAR TANAH BANDANG

MANUKAR TANAH BANDANG.

      Di sabab kan parajinan, ayah ku hingkat basimpanan duit. Hingkat manukar tanah bandang sa kaping di parit 11. Bahari harga tanah murah kaluku. Ujar nyak, sakaping tanah tu rm400.00 haja ai. Amun wahini kadida nang kurang 50 ribu sakaping. Tapi bahari, walau pun murah, duit ngalih mancari, harap maambil upah barapa sen banar dapat nyak. Dua tiga kupang haja. Amun kada bujur2 rajin, kada taoleh duit sabanyak to. Tu pasal bila ku ganang2 kisah urang bahari, rasa handak manangis aku. Kaya apa susahnya urang bahari barusahak, manyadiakan tanah agan kaganaan anak cucu nyak. Amun kuwitan kadida batanah, kamanak anak2 handak bulikan, walau pun satahun sakali. Bersyukur lah banyak2 kapada ALLAH.

AYAH KU PARAJINAN ORANG NYAK

AYAH KU PARAJINAN URANG NYAK.

      Soal bagawi nik ayah ku mimang parajinan, napa hajak ada gawian kampung samuwaan bisa di ulahnya. Babandang tantu lah gawian utama nyak. Rajin maambil upah di bandang urang. Salain dari babandang, maambil upah manabas, manyangkul, manukang, mangait niur, bah macam2 mai lagik. Kada kasambatan. Bahari sakolah tu kada panting banar, yang panting bisa awan rajin hajak bagawi. Tapi ayah ku dahulu sawat tai sakolah, uji nyak masuk 2 tahun sakulah, bisa pang mambaca/manulis jawi awan rumi. Kira handal toh. Mangaji gin bisa banar, balajar awan padatuan. Barjanji gin bisa banar, nyaman banar suara ayah ku bahari, karap hajak dapat undangan barjanji di majlis2 urang bakakawinan. Ayah ku gin bisa bau ulah, baulah tangguk, hancau, jala, bubu, lukah, macam2 mai lagi. Gambus gin bisa di ulah nyak, bisa pulang tu main gambus.  Asa rami ai hati ku wayah tu.

RUMAH AYAH KU BATIHANG NIBUNG

   Ta-ingat masa akuk haloi, rumah ayah kuk gin haloi hajak. Kaya pupundukan pang. Tihang nyak batang nibung, lantainya batang kayuk sardang di balah balah. Hatap awan tawing nyak daun nipah. Intang dapur hajak tawing nyak dari buluh. Urang bahari kaituk ai kabanyakan nyak, susah susah, tapi rajin rajin berusahak. Banyak banda maolah saurang hajak. Rumah ayah kuk tuh sabigian mau’lah saurang hajak. Duit kadadak handak manukar. Kayu, nibung, sardang samuanyak mancari surang di hutan. Bagutong ruyong awan kakawanan ayah babasikal, maangkut dari hutan di bawak bulik. Hatap daun nipah gin menyambit surang hajak, banyak pokok nyak di kawasan bandang paninian. Memang orang bahari banyak mananam pokok nipah, sanang hagan maulah hatap awan tawing rumah. Rumah bahatap nipah atau rumbia ni, nyaman, kada hangat, dingin hajak. Satu hajak pantang nya, jangan di salokot awan api, satumat jua, habis pang manjadi habu. Wayah hinik juwaai kadadak lagi tahaga rumah hurang bahatap batawing daun nipah.

BARANAK DI RUMAH.

    Mangikut carita umak ku, aku di baranakkan di rumah hajak, di rumah paninian ku di Parit 8. Bahari mana ada hospital, amun handak baranak ambili hajak bidan kampung, kada payah ambili misi, bisa hajak bidan kampung maurusakan. Paadingan ku ada 5 hajak. Aku anak nang kadua. Ada saikung abang,(sudah maninggal), imbah tu ading babinik, ading lalaki awan nang bungsu, ading babinik. Wahini kira aku pang nang panjauh nyak baganak dari kampung asal. Masa carita ni ku tulis, umak ku hidup haja lagi, wagas hajak habar nyak. Ayah ku hajak nang sudah jadi arwah, kurang labih 5 tahun dahulu. Kaitu lah sarba sadikit manganai diri kaluarga ku.

PAMULAAN

   Kadak tahuk aku macammanak handak mamulakan blog nih. Memang akuk bisak banar basurah banjar, tapi satakat ni kadadak aidia handak mamulakan. Kada tahulah badudi, amun ada carita carita lawas yang masih kaganangan, akan akuk taipkan di halaman nih kayinak. Masa nik banyak kulir nya lagik, kadak tapi ada masa, wal hal banyak ja carita carita bahari yang rami di dangar atau di bacak oleh urang urang nak mangarti bahasa banjar ni. ayuha....insaalah akuk taipkan di masak akan datang